提多書 2
正確嘅教義1 至於你,你嘅教導必要合乎正確嘅教義。
2 你要勸老年人,要嚴肅,有好品格,管束自己,有正確嘅信心、愛心,同耐心。
3 你亦要勸年老嘅婦女,行為謹慎。唔好搬弄是非,唔做酒嘅奴隸。做好榜樣,
4 善導年輕婦女,訓練佢哋點樣愛丈夫同仔女,
5 點樣管束自己,貞潔,善於處理家務,服從丈夫,免致上帝嘅道被毀謗。
6 同樣,你亦要勸年輕人,管束自己。
7 你自己,無論喺乜嘢事上都要有好行為,做人嘅模範。教導人要誠懇、嚴肅,
8 言語要恰當,等人哋冇批評嘅餘地。噉樣,嗰啲敵對嘅人,因為揾唔到我哋嘅錯處,就無話可講而覺得慚愧。
9 你要勸做奴僕嘅,服從主人,凡事討主人嘅喜歡,不可頂撞佢哋,
10 亦唔好偷竊,凡事表現忠厚可靠,喺所做嘅一切事上,使有關我哋救主上帝嘅教義更受尊重。
11 因為上帝拯救全人類嘅恩典已經顯明出嚟。
12 此恩典訓練我哋棄絕唔敬虔嘅行為同屬世嘅私慾,喺世上過自制、正直、同敬虔嘅生活,
13 等我哋盼望蒙恩嘅日子來臨;嗰時,至尊嘅上帝同我哋嘅救主耶穌基督嘅榮耀要顯現。
14 基督為我哋獻上自己,救我哋脫離一切邪惡,使我哋成為佢純潔嘅子民,歸返俾佢,熱心行善。
15 你要講論此事,充分運用你嘅職權嚟勸勉人或責備人,唔好俾人睇輕你。