Library · yue

提多書 3

基督徒嘅行為

1 你要提醒眾人,要佢哋服從執政者同當權者,隨時隨地聽從命令做各樣好事。

2 勸佢哋唔好毀謗人,唔好鬧交;要和氣友善,用謙卑嘅態度對待所有嘅人。

3 我哋從前亦係無知、悖逆,同迷失嘅;我哋做咗各種情慾同享樂嘅奴隸,生活喺惡毒同嫉妒裏,互相仇恨。

4 但我哋嘅救主上帝已經顯出佢嘅慈愛,

5 透過聖靈所施重生同更新嘅洗禮,拯救咗我哋;並唔係因為我哋自己有乜嘢好行為,係因為佢憐憫我哋。

6 透過我哋嘅救主耶穌基督,上帝將聖靈厚厚澆灌喺我哋身上;

7 由於佢嘅恩典,使我哋因信稱義,得到盼望嘅永生。

8 此話係可信嘅。我希望你特別強調呢啲事,使信徒熱心行善;此事都係美好嘅,係對人有益嘅。

9 要避免無知嘅辯論同有關族譜名錄及律法上嘅爭執;呢啲都係冇益、冇價值嘅。

10 對製造紛爭嘅人,至少俾佢兩次警告,以後就唔再同佢來往。

11 噉樣嘅人係腐化嘅;佢嘅罪行證明自己係錯誤嘅。

最後嘅指示

12 我打發亞提馬或推基古去你處時,你要盡可能趕到尼哥波立嚟見我,因為我已決定喺嗰處過冬。

13 要盡力促成律師西納同亞波羅旅行嘅計劃,幫助佢哋,使佢哋不至於有缺乏。

14 吩咐我哋自己嘅人,要喺正當嘅工作上多多努力,嚟供應生活上嘅需要;唔好做閒懶無用嘅人。

15 同我喺一齊嘅人都問候你。請向同一信仰嘅朋友問安。願上帝賜恩典俾你哋眾人!