Library · yue

希伯來書 10

1 律法唔係真事物嘅完整同確實嘅模型,只係將來美好事物嘅影。同樣嘅祭物每年唔停噉獻上,律法又點能透過此祭物使嚟到上帝面前嘅人得到完全呢?

2 若敬拜上帝嘅人嘅罪真係得到潔淨,佢哋就唔會再有罪嘅感覺,一切獻祭嘅事亦可以停止。

3 其實,每年獻祭只係使人記起自己嘅罪,

4 因為公牛同山羊嘅血都不能除去人嘅罪。

5 為噉,基督臨世時,向上帝話:你唔要牲祭同供物;你已經為我預備個身體。

6 你唔喜歡祭壇上嘅燔祭,亦唔喜歡贖罪祭。

7 於是我話:上帝呀,我嚟,行你嘅旨意,好似律法書上所寫,關於我嘅事。

8 首先佢話:「你唔要,亦唔喜歡牲祭同供物,或祭壇上燔祭同贖罪祭。」雖然此祭物係照律法獻上嘅,佢仍然係噉樣講。

9 佢跟住話:「上帝呀,我嚟,行你嘅旨意。」為噉,上帝取消一切先前獻祭,用基督嘅犧牲代替。

10 耶穌基督遵行上帝嘅旨意,只係一次獻上自己嘅身體,使我哋得以成聖。

11 猶太嘅祭司每日企喺處事奉上帝,多次獻上同樣嘅祭物;但此祭物永遠不能替人除罪。

12 但基督獻上一次永遠有效嘅贖罪祭,然後坐喺上帝嘅右邊,

13 喺嗰處等上帝使佢嘅敵人屈服喺佢腳下。

14 佢一次犧牲,使成聖嘅人永遠成為完全。

15 聖靈亦曾對我哋作證;首先話:

16 主話:喺以後嘅日子,我要同佢哋立噉樣嘅約;我要將我嘅律法放喺佢哋心內,寫喺佢哋裏頭。

17 佢跟住話:「我唔再記住佢哋嘅罪惡同過犯。」

18 所以,既然罪得到赦免,贖罪祭就唔再需要。

我哋親近上帝

19 兄弟呀,我哋靠耶穌嘅死可以放膽入去至聖所。

20 佢為我哋開咗一條新路,通過帳幔,係通過佢身體嘅生路。

21 既然我哋有一位大祭司掌管上帝嘅家,

22 我哋應該用誠實嘅心同堅定嘅信心,用已經被潔淨、無虧嘅良心,同清水洗過嘅身體,嚟親近上帝。

23 等我哋堅定不移持守我哋宣認嘅盼望,因為上帝嘅應許係可靠嘅。

24 等我哋彼此關懷,激發愛心,勉勵行善。

25 唔好好似有啲人停止聚會嘅習慣,我哋要彼此勸勉;既然知道主嘅日快到,你哋更應該噉樣。

26 我哋若認識真道後,仍然故意犯罪,就唔再有任何可以贖罪嘅祭物。

27 惟有戰戰兢兢等候審判同嗰啲會燒滅敵對上帝之人嘅烈火!

28 嗰啲違犯摩西律法嘅,只要有兩個或三個證人證明佢嘅過犯,就必要處死,冇得寬恕。

29 何況,對於蔑視上帝之子,輕看上帝嘅約血一即係潔淨佢罪嘅血,並且侮辱恩典嘅靈嘅人又應該點樣處置呢?你哋諗下,佢唔係應該受更嚴厲嘅懲罰咩?

30 我哋知道邊個講過:「伸冤在我,我必報應」;又話:「主要審判佢嘅子民。」

31 上帝係永活嘅;落喺佢嘅手裏真係可怕呀!

32 要記得舊時嘅日子。上帝光照你哋之後,你哋遭遇好多痛苦,但並冇喺爭戰中失敗。

33 有時,你哋當眾受人侮辱同虐待;你哋同遭受苦難嘅人做同伴。

34 你哋同囚犯一齊受苦。當你哋所有嘅財物被奪走時,你哋甘心忍受;因為你哋知道,你哋重有更美好長存嘅産業。

35 所以,你哋唔好喪失勇氣;此勇氣帶俾你哋好大嘅賞賜。

36 為實行上帝嘅旨意同領受佢嘅應許,你哋必要忍耐。

37 因為聖經話:再過一陣,嗰位要嚟嘅就嚟,唔會延遲。

38 屬我嘅義人必因信得生。但係,若有人退後,我就唔喜歡佢。

39 我哋並唔係退後而沉淪嘅人;係有信心而得救嘅人。