希伯來書 11
論信1 信係所望之事嘅實基,係未見之事嘅確據。
2 古人由信得上帝嘅讚許。
3 由信,我哋知道宇宙係由上帝嘅話造成;嗰啲睇得見嘅係由睇唔見嘅造出嚟。
4 由信,亞伯比該隱獻上更好嘅祭物俾上帝。佢由信,贏得上帝嘅讚許,被稱為義人,因為上帝親自悅納佢嘅禮物。佢雖然死,仍透過信心講話。
5 由信,以諾能不見死。佢被提升去上帝處,冇人能搵到佢,因為上帝已經將佢接去。聖經話,佢被升以前已得到上帝嘅喜悅。
6 人冇信就不能得到上帝嘅喜悅。所有嚟到上帝面前嘅人都必要信上帝嘅存在,而且信佢將賞賜尋求佢嘅人。
7 由信,挪亞喺重未見到嘅事上,聽從上帝嘅警告,造一隻方舟,使佢同全家得到安全。瞰樣,就定世代既罪,而佢自己從上帝領受因信而有嘅義。
8 由信,亞伯拉罕順服上帝嘅呼召,去到上帝應許將賜俾佢嘅地。佢離開本國時,並唔知道要去邊處。
9 佢由信主喺上帝應許嘅異地作客,同領受上帝同樣應許嘅以撒同雅各一齊住喺帳幕。
10 因為亞伯拉罕盼望嗰座由上帝設計建造、根基永固嘅城。
11 雖然亞伯拉罕已老,撒拉亦過咗生育嘅年齡,佢由信仍然能做父親,因為佢相信上帝會持守佢嘅應許。
12 雖然亞怕拉罕似乎已經死,由佢一人所傳落嚟嘅子孫如同天上嘅星同海邊嘅沙咁多。
13 呢啲人係到死都有信心。佢哋並冇領受到上帝應許嘅;但係從遠處觀望,心裏歡喜,又承認佢哋喺世上不過係異鄉人同流浪嘅旅客。
14 講此話嘅人顯然表示佢哋替自己搵一個家鄉。
15 佢哋並冇掛住已經離開嘅地,倘若唔係,佢哋重有返去嘅機會。
16 佢哋渴慕嘅係天上更美好嘅家鄉;所以,上帝並唔因佢哋稱佢為上帝而覺得恥辱,因為佢已經為佢哋預備一座城。
17 由信,亞伯拉罕喺上帝考驗佢時,將以撒獻上做祭物。亞伯拉罕乃係領受上帝應許嘅人,但係佢情願將獨生嘅仔作為祭物獻上。
18 上帝曾對佢話:「你將從以撒得到我所應許嘅子孫。」
19 佢認為上帝能令人從死者中復生。其實,我哋亦可以話,亞伯拉罕的確曾將以撒從死裏得返嚟。
20 由信,以撒為將來嘅事祝福雅各同以掃。
21 由信,雅各臨終時分別為約瑟嘅兩個仔祝福;扶住自己嘅杖敬拜上帝。
22 由信,約瑟臨終時提起以色列族將來要離開埃及嘅事,並對自己遺體嘅埋葬囑咐。
23 由信,摩西出世後,佢父母睇見嬰兒俊美,將佢隱藏三個月;佢哋唔怕王嘅命令。
24 由信,摩西長大後,拒絕被稱做埃及公主嘅仔。
25 佢寧願同上帝嘅子民一齊受苦,唔願喺罪惡裏享受一陣嘅歡樂。
26 喺佢眼中,為基督受凌辱,比埃及所有嘅財寶更加寶貴,因為佢盼望將來嘅獎賞。
27 由信,摩西離開埃及,唔怕王嘅震怒;因為佢似乎睇見肉眼所睇唔見嘅上帝,堅忍到底,唔肯返去。
28 由信,佢設立逾越節,並吩咐將血灑喺門上,使嗰位執行毀滅嘅天使唔殺以色列人嘅長子。
29 由信,以色列人能過紅海,好似行乾地一樣;埃及人一試,水就將佢哋淹沒。
30 由信,以色列人圍住耶利哥城行咗七日之後,城牆就冧。
31 由信,妓女喇合唔使同唔服從上帝嘅人一齊被殺,因為佢友善接待探子。
32 我又何必講呢?我冇足夠嘅時間去提其田、巴拉、參孫、耶弗他、大衛、撒母耳,同眾先知嘅事蹟。
33 佢哋由信,戰勝周圍嘅國。施行正義,領受上帝嘅應許。塞住獅子嘅口,
34 撲滅烈火,逃脫刀劍嘅殺戮。佢哋變軟弱為剛強,喺戰場上發揮威力,擊敗外國嘅軍隊。
35 由信,有啲婦女接納從死復生嘅親人。另有人拒絕被釋放,寧願死喺酷刑,為要得到更美好嘅新生命。
36 又有人忍受戲弄,鞭打;亦有人被捆綁,囚禁喺監。
37 有人被石掟死,被鋸鋸斷,被刀劍殺死。有人披住綿羊山羊嘅皮,到處奔跑,忍受窮困,迫害,同虐待。
38 此世界唔值得佢哋居留!佢哋好似難民一樣,喺荒野同山嶺間流浪,喺山窿同地穴裏棲身。
39 呢啲人嘅信心都有好唔平凡嘅記錄;但係佢哋並冇領受到上帝應許嘅,
40 因為上帝決定俾我哋有更美好嘅安排。佢嘅旨意係:佢哋必要同我哋一齊至能達到完全。