希伯來書 13
點樣得上帝嘅歡心1 你哋要常存兄弟相愛嘅心。
2 接待客旅到你哋嘅家住。曾經有人噉做,竟然無意中接待咗天使。
3 要記得嗰啲坐監嘅人,好似你哋亦係同佢哋一齊坐監。要記得嗰啲喺患難裏嘅人,好似你哋亦喺患難裏一樣。
4 眾人應該尊重婚姻嘅關係;夫妻必要忠誠相待。上帝要審判放蕩同淫亂嘅人。
5 唔好貪錢,要滿足於自己所有嘅。因為上帝講過:「我永遠唔離開你,永遠唔丟棄你。」
6 噉樣,我哋應該大膽話:主係我嘅幫助,我唔使驚;人能將我點樣呢?
7 你哋要記念以前帶領你哋、向你哋傳上帝信息嘅人。回想佢哋生前點樣生活,點樣死;要效法佢哋嘅信心。
8 耶穌基督,昨日、今日、直到永遠,都係一樣嘅。
9 唔好俾各種怪異嘅學說將你哋引入歧途。應該倚靠上帝嘅恩典,嚟堅固你哋嘅心靈,唔好倚靠食物嘅規例;倚靠嗰啲規例嘅人並冇得到幫助。
10 喺帳幕裏事奉嘅猶太祭司冇權食我哋祭壇上嘅祭物。
11 猶太大祭司將牲畜嘅血帶入至聖所,將佢當做贖罪嘅祭物獻上。牲畜嘅身體就喺營外焚燒。
12 為噉,耶穌亦死喺城外,用自己嘅血去潔淨人嘅罪。
13 我哋亦應該到營外去搵佢,分擔佢受嘅凌辱。
14 喺地上,我哋冇永遠嘅城;我哋係尋求嗰個將來嘅城。
15 我哋應該透過耶穌,成日以頌讚為祭,獻俾上帝,用我哋嘅嘴唇嚟宣認佢嘅名。
16 唔好忘記行善同幫助他人,因為噉樣嘅祭物係上帝喜歡嘅。
17 要服從你哋嘅領袖,聽佢哋嘅話。佢哋成日看顧你哋嘅靈魂,因為佢哋將來要向上帝報告。你哋聽從佢哋,佢哋就會高興報告,倘若唔係,佢哋就會滿心憂愁,就對你哋係冇益嘅?
18 請唔停為我哋禱告。我哋自信有清白嘅良心,願意常時走正直嘅路。
19 我更要求你哋為我禱告,求上帝使我能返去你哋處。
禱告20 上帝已經使我哋嘅主耶穌從死裏復生。佢透過耶穌流嘅血印證永恆嘅約,使佢成為羣羊嘅大牧人。
21 願賜平安嘅上帝喺你哋做各樣善事上成全你哋,使你哋能遵行佢嘅旨意。願佢透過耶穌基督喺我哋身上成就佢喜歡嘅事,願榮耀歸俾基督,世世無窮!阿們。
最後嘅話22 兄弟呀,我求你哋耐心領受此勸勉嘅話;我並冇將此信寫得太長。
23 我要你哋知道,我哋嘅兄弟提摩太已經出監。若佢早嚟,佢會同我一齊去睇你哋。
24 請向你哋嘅領袖同眾聖徒問安。由意大利嚟嘅兄弟向你哋問安。
25 願上帝賜恩典俾你哋眾人!