雅各書 1
1 我雅各係上帝同主耶穌基督嘅僕人;我問候散居全世界十二支派嘅人。
信心同智慧2 兄弟呀,你哋遭遇各種試煉,應該認為係可慶幸嘅事,
3 因為知道你哋嘅信心經過考驗就會産生忍耐。
4 你哋要忍耐到底至能達到十全十美、毫無欠缺。
5 你哋中若有缺少智慧嘅,應該向上帝祈求,佢會賜智慧俾你哋,因為佢樂意豐富賜俾每人。
6 不過,你哋要憑信心求,唔好有乜嘢疑惑;疑惑嘅人好似海中嘅波浪,被風吹動,不停翻騰。
7 噉樣嘅人三心兩意,搖擺不定,唔好希望從主得到乜嘢。
8 拼於上節
貧窮同富有9 貧窮嘅兄弟被上帝提升,應該高興;
10 富有嘅人被貶低,亦應該噉樣。富有嘅人好似野花一樣凋謝。
11 烈日一出,熱風一吹,草木枯乾,花朵凋謝,所有嘅美就消失。富有嘅人喺事業上忙碌時,亦會好似花草一樣,枯乾凋謝。
考驗同試誘12 遭受試煉而忍耐到底嘅人有福;因為通過考驗之後,佢會領受上帝應許生命嘅冠冕。
13 人經歷呢種試煉,唔好話:「上帝試探我」;因為上帝唔受邪惡試探,亦唔試探人。
14 人受試探,係被自己嘅慾望勾引。
15 佢嘅慾望懷胎,生出罪惡,罪惡一旦長成就産生死亡。
16 我親愛嘅兄弟,唔好被愚弄!
17 一切美善嘅事物同各樣完美嘅恩賜都係由天嚟嘅,從眾光之父處降落嘅。在佢係冇改變,亦冇轉動嘅影。
18 佢照自己嘅旨意,透過真理生我哋,使我哋喺佢造嘅萬物好似初熟嘅果。
聽同行19 我親愛嘅兄弟呀,你哋每人都應該隨時聽人哋嘅意見,唔好急於發言,更唔好輕易發嬲。
20 人嘅憤怒並不能達成上帝公義嘅目的。
21 所以,你哋要擺脫一切不良嘅習慣同邪惡嘅行為,用順服嘅心接受上帝種喺你哋心裏嘅道,即係能救你哋嘅道。
22 你哋唔好呃自己,以為只聽道就夠;你哋必要行道。
23 聽道而唔去實行嘅,好似一個人對住塊鏡,睇自己嘅面貌,
24 睇完走開,就即刻忘記自己嘅面貌。
25 但嚴謹查考完整又使人得自由嘅法則而謹守嘅人,唔係聽咗就忘記,係落實遵行;噉樣嘅人喺佢做嘅事必得上帝賜福。
26 邊個自以為虔誠,但唔管束自己條脷,就係呃自己;佢嘅虔誠毫無價值。
27 喺父上帝眼中,純潔冇缺點嘅虔誠係:照顧喺苦難裏嘅孤兒寡婦同保守自己唔受世界嘅影響。