Library · yue

彼得前書 1

1 我彼得係耶穌基督嘅使徒。我寫信俾上帝選召嘅子民:因避難散居喺本都、加拉太、加帕多家、亞西亞、庇推尼各地嘅兄弟。

2 你哋蒙召係照父上帝預定嘅旨意,係由聖靈得成聖潔嘅,以致順服耶穌基督,並得到佢嘅血潔淨。願上帝豐富的賜恩典,平安俾你哋!

活潑嘅盼望

3 我哋要感謝我哋主耶穌基督嘅父上帝!由佢無限嘅仁慈,透過耶穌基督由死裏復生,將新嘅生命賜俾我哋,使我哋有活潑嘅盼望,

4 嚟承受上帝賜佢嘅子民嘅産業。此天上嘅産業係唔敗壞,唔污損,亦唔衰殘嘅,

5 俾你哋因信得上帝能力保守嘅人,使你哋得到嗰啲已經預備好、將喺歷史嘅終點實現嘅救恩。

6 為噉,你哋大有喜樂,但現今喺各樣試煉裏暫時憂愁;

7 呢種經歷無非要證明你哋的確有堅定嘅信心。甚至嗰啲能毀壞嘅金亦要經過火煉;你哋嘅信心比金貴重得多,更必須受考驗,使你哋喺耶穌基督顯現嘅日得到稱讚、榮耀,尊貴。

8 你哋雖然冇見過佢,都愛佢;雖然現今睇唔見佢,都信佢,有言語所不能表達嘅無限喜樂;

9 並得到你哋信心嘅效果,即係你哋靈魂嘅救恩。

10 呢啲救恩,先知已經有詳細嘅尋求同考察,預先講上帝要賜俾你哋嘅恩典。

11 佢哋努力考察,要知基督嘅靈喺佢哋裏所指示嘅─係預言基督必要受苦難,後來必得榮耀嘅事─會喺乜嘢時候,喺邊一種情況下實現。

12 上帝啟示先知,佢哋嘅工作並唔係為自己,係為你哋。佢哋所講嘅事,現今傳福音嘅使者已經透過從天打發來嘅聖靈,傳俾你哋;此事連天使亦希望明白!

聖潔生活

13 所以,你哋嘅心要準備好,常時警惕,將希望完全寄託喺耶穌基督顯現時要賜俾你哋嘅恩典。

14 要順服上帝,唔好俾私慾支配你哋,好似從前你哋愚昧無知時噉樣。

15 嗰位呼召你哋嘅上帝係聖潔嘅;你哋亦必要喺所做一切事上聖潔。

16 聖經話:「你哋要聖潔,因為我係聖潔。」

17 你哋禱告時,稱嗰位照人嘅行為,用同一標準嚟審判人嘅上帝做父;就當喺你哋寄居世上嘅日子敬畏佢。

18 你哋知道,你哋能從祖傳嘅敗壞裏釋放出嚟係付咗乜嘢代價?並唔係嗰啲會失去價值嘅金銀等物,

19 而係透過基督流寶貴嘅血,如同無瑕疵無玷污羔羊嘅血。

20 基督係上帝喺創世以前預先揀選,喺歷史嘅末期為你哋嘅緣故顯現。

21 透過佢,你哋信使佢從死裏復生、並賜榮耀俾佢嘅上帝;等你哋嘅信心同盼望都集中喺上帝。

22 你哋因順服真理,已經潔淨自己,並且真誠愛其他嘅兄弟,就當從心裏熱切彼此相愛。

23 你哋得到重生,唔係從會朽壞嘅種,係從唔會朽壞嘅種一即係上帝活潑永恆嘅道。

24 好似聖經所講:人好似野草一樣,佢哋嘅榮華好似野花;草必枯乾,花必凋謝,

25 但係主嘅道永遠長存!此道就係傳俾你哋嘅福音。