Library · yue

彼得前書 2

活嘅石同聖潔嘅國度

1 所以,你哋要除去一切壞事,唔再講大話,假冒為善,嫉妒,或講人壞話;

2 要似新生嘅嬰孩,渴慕純淨嘅靈乳,由此長大,以致得救。

3 好似聖經所講:「你哋嘗過主嘅恩慈。」

4 要親近主─佢係活石;被人遺棄,但上帝揀選佢,珍惜佢。

5 你哋亦要好似活石,用嚟建造屬靈嘅聖殿,做聖潔嘅祭司。由耶穌基督獻上上帝所悅納嘅屬靈祭物。

6 因為聖經話:我揀選一塊貴重嘅石嚟做錫安嘅牆角石;所有信靠佢嘅,都不至於失望。

7 對你哋信嘅人,此石係好寶貴;但對嗰啲唔信嘅人有噉話:匠人丟棄嘅石已成為最重要嘅基石!

8 喺聖經另一處話:呢絆腳嘅石係使人跌倒嘅石。佢哋跌倒,因為佢哋唔順從真道;呢啲亦係出於上帝嘅旨意。

9 但你哋係蒙揀選嘅一族,係王室嘅祭司,聖潔嘅國度,上帝嘅子民。上帝選召宣揚佢使你哋出黑暗入奇妙光明嘅美德。

10 從前你哋唔係上帝嘅子民,現今係佢嘅子民;從前未得到上帝嘅憐憫,現今已經得到佢嘅憐憫。

上帝嘅奴僕

11 親愛嘅朋友,你哋喺世上係旅客,係寄居嘅!我勸你哋,唔好放緃肉體嘅情慾;呢種情慾係同靈魂爭戰嘅。

12 喺異邦人中,應該品行端正,使講你哋壞話、指責你哋做壞事嘅人,因睇見你哋嘅好行為,就喺主再來嘅日,歸榮耀俾上帝。

13 為主嘅緣故,你哋要順從人間嘅掌權者:即係在上嘅君王。

14 同佢委派執行賞善罰惡嘅長官。

15 因為上帝嘅旨意係要你哋用好行為嚟塞住糊塗無知人嘅口。

16 你哋係自由人,但唔好用自由嚟掩蓋任何邪惡;總要做上帝嘅奴僕。

17 你哋要尊重每個人;要愛信主嘅兄弟姊妹;敬畏上帝;尊敬君王。

基督忍受苦難嘅榜樣

18 做奴僕嘅,要恭敬服從主人,唔單只對良善溫和嘅主人噉樣,對乖僻嘅主人亦要噉樣。

19 若你哋因知道係上帝嘅旨意,願意忍受唔應該受嘅痛苦,上帝就會賜福俾你哋。

20 若你哋係因犯錯而忍受責打,有乜嘢光榮呢?只有因行善而忍受苦難嘅人至能得到上帝賜福。

21 上帝呼召你哋正係為此;因為基督為你哋受苦,為你哋留下榜樣,等你哋能跟隨佢嘅腳步嚟行。

22 佢冇犯過罪;口中亦無詭詐。

23 佢受辱駡唔還口,受虐待亦唔講恐嚇嘅話,淨係仰望公義審判嘅主。

24 基督親身將我哋嘅罪帶到十字架上,使我哋唔再生活喺罪裏,只係為公義而活。由於佢受嘅創傷,你哋得到醫治。

25 以前你哋好似迷羊,現今已歸返你哋靈魂嘅牧人監督咯。