啟示錄 12
女人同戾龍1 嗰時,天上出現一個又大又神秘嘅景象。有一個女人身披太陽,腳踏月亮,頭戴十二粒星嘅冠冕。
2 佢就嚟要生仔,生仔嘅陣痛使佢呼叫。
3 天上又出現另一個神秘嘅景象。有條紅色嘅大紅龍,七頭十角,頭戴七冠冕。
4 佢用尾捲起天上三分一嘅星,扔落地。龍就企喺就快要生仔嘅女人前,等嬰孩一出世,就吞食佢。
5 女人生一個仔;係將來用鐵杖統治萬國嘅。但係,佢嘅仔被提到上帝嘅寶座上。
6 女人就逃去曠野,到上帝為佢預備嘅地方。喺嗰處,佢受照顧一千二百六十日。
7 後來,天上發生戰爭。米迦勒同佢嘅天使與龍打仗,龍同佢嘅使者亦起嚟應戰。
8 但,龍被打敗;佢同佢嘅使者唔可以再留喺天上。
9 大龍就係嗰條古蛇,叫做魔鬼又叫撒但,係迷惑全人類嘅。佢被扔落地;佢嘅使者亦跟住被扔落去。
10 我又聽見天上有大聲話:「現今就係上帝拯救嘅時刻!上帝已彰顯佢嘅權能!佢所立嘅基督亦顯示佢嘅權威!嗰個日夜喺我哋上帝前控告我哋兄弟嘅,已經從天上被扔落去。
11 我哋嘅兄弟勝咗龍,係因羔羊嘅血同佢哋所宣佈嘅真理;佢哋甚至願意犠牲自己嘅生命。
12 所以,諸天同住喺其中嘅,你哋都應該快樂!但地同海有禍咯。因為魔鬼已經滿懷忿恨落去你哋處,因為佢知自己來日無多。」
13 龍知自己被扔落地,就去追擊嗰個生仔嘅女人。
14 佢得到大鷹嘅兩翼,能飛到曠野,到佢自己嘅地方。喺嗰處,佢受照顧三年半,使佢不致受蛇嘅攻擊。
15 蛇喺女人背後,從口噴出洪水,將佢沖走。
16 但,地幫助女人,開口吞嘥嗰條龍噴出嘅水。
17 龍向女人發嬲,去同佢其餘嘅後代爭戰,即係同所有服從上帝命令、忠於耶穌所啟示嘅真理嘅。
18 嗰時龍企喺海灘上。