Library · yue

啟示錄 20

一千年

1 此後,我睇見一位天使從天降落,手揸住無底坑嘅鎖匙同一條大鍊。

2 佢捉住嗰條龍,即係古蛇,又叫魔鬼,亦叫撒但,將佢捆綁一千年。

3 天使將佢扔落無底坑,關閉起,加上封印,使佢唔再去迷惑列國,直到一千年過後,佢要暫時被釋放。

4 我又睇見一啲寶座;坐喺上面嘅人都得到審判嘅權柄。我亦睇見嗰啲因承認耶穌啟示嘅真理同上帝嘅道而被斬者嘅靈魂。佢哋冇拜過獸同獸像,額或手亦冇獸嘅印記。佢哋都復生,同基督一齊做王一千年。

5 (其餘嘅死人要等嗰一千年滿咗致復生。)呢次係頭一次嘅復生。

6 喺頭一次復生嘅人係聖潔有福。第二吹嘅死喺佢哋身上冇權柄;佢哋要做上帝同基督嘅祭司,亦要同基督一齊做王一千年。

擊敗撒但

7 一千年後,撒但必從監裏被釋放;

8 出嚟迷惑地上四圍嘅國,即係歌革同瑪各。撒但使佢哋集合,出去打仗;佢哋嘅人數多如海沙。

9 佢哋上嚟遍滿全地,圍困上帝子民嘅營同佢所愛嘅城。但係有火從天降落,燒滅佢哋。

10 嗰啲迷惑佢哋嘅魔鬼被扔落硫磺嘅火湖裏;即係獸同偽先知所在嘅地方。喺嗰處,佢哋日夜受折磨,直到永遠。

最後審判

11 此後,我睇見一個白色嘅大寶座同坐喺上面嘅。天同地都從佢面前逃避,唔再搵得返佢哋嘅住所。

12 我又睇見已死嘅人,無論尊貴卑微,都企喺寶座前。案卷展開;另外有一本生命冊亦展開。已死嘅人都係照住佢哋嘅行為,根據案卷所記錄嘅,接受審判。

13 海將死人交出;死亡同陰間都將監禁嘅死人交出。呢啲人都照各人所行嘅嚟接受審判。

14 死亡同陰間亦被扔落火湖。(呢個火湖就係第二嘅死。)

15 凡名字冇記錄喺生命冊上嘅,都被扔落火湖。