Library · yue

啟示錄 21

新天新地

1 此後,我睇見一個新天新地。因為先前嘅天地已不見,海亦消失。

2 我又睇見聖城,新耶路撒冷,由上帝處,從天而降已經預備好,好似打扮好嘅新娘嚟迎接佢嘅丈夫。

3 我聽聞有大聲由寶座出來,話:「上帝嘅家喺人間!佢要同人住喺一齊,佢哋要做佢嘅子民。上帝要親自同佢哋同在,做佢哋嘅上帝。

4 佢擦去佢哋每一滴眼淚;唔再有死亡,亦唔再有悲傷、哭泣,痛苦。因為以往嘅事都已經過去。」

5 嗰時,坐喺寶座嘅話:「睇吓,我更新一切!」佢又話:「要寫落,因為此話係真實可靠嘅。」

6 佢又對我話:「成咗咯!我係阿拉法同俄梅咖,我係開始,我係終結。我要將生命嘅泉水白白賜俾口渴嘅人飲。

7 得勝嘅必承受呢啲:我要做佢嘅上帝;佢要做我嘅仔。

8 但膽怯、背信、腐敗、殺人、淫亂、行邪術、拜偶像,同講大話嘅,有燒硫磺嘅火湖等住佢哋;呢啲就係為二次嘅死。」

新耶路撒冷

9 揸住七個碗,裝滿末後七災嘅七位天使中,有一位嚟對我話:「你嚟,我要俾你睇見新娘,即係羔羊嘅妻。」

10 我被聖靈感動;天使帶我到高山嘅頂峰,俾我睇見由上帝處,從天而降嘅聖城耶路撒冷。

11 城中充滿上帝嘅榮光,閃耀似碧玉寶石,光潔好似水晶,

12 有高大嘅城牆,城牆有十二度門,由十二位天使看守,門上寫着以色列十二支派嘅名。

13 海邊有三度門;東邊三度,西邊三度,南邊三度,北邊三度。

14 城牆有十二基石,基石上寫落羔羊十二使徒嘅名。

15 對我講話嘅天使揸住一把金嘅量尺量嗰個城、城門同牆。

16 城係四方嘅、長闊一樣;天使用尺量城:共兩千四百公里,長、闊、高一樣。

17 天使照人嘅尺寸標準嚟量城牆,高六十公尺。

18 城牆係用碧玉造嘅,而城本身係用透明到似玻璃嘅純金造嘅。

19 城牆嘅基石用各種寶石裝飾:第一基石係碧玉,第二係藍寶石,第三係瑪瑙,第四係綠寶石,

20 第五係紅瑪瑙,第六係紅寶石,第七係黃璧璽,第八係水蒼玉,第九係紅璧璽,第十係翡翠,第十一係紫瑪瑙,第十二係紫晶。

21 十二度門係十二顆珍珠,每門用一顆珍珠造成。城裏嘅街道係純金嘅,好似玻璃一樣透明。

22 我冇睇見城裏有聖殿,因為主—全能嘅上帝同羔羊係此城嘅聖殿。

23 此城唔需要日同月嘅光;因為有上帝嘅榮光照耀,而羔羊係此城嘅燈。

24 世上各國都要靠城嘅光嚟行走;地上嘅君王必將佢哋嘅榮華帶到此城。

25 城門成日打開,永遠唔閂,因為嗰處冇黑夜。

26 所有國都將榮耀尊貴歸俾此城。

27 但所有唔潔淨、行為可憎與及講大話嘅,都唔入得去;只有名寫落羔羊生命冊嘅致可以入去。