Job 10
10:1 Ka hingnah soah ka hinglu loh a ko-oek coeng. Ka kohuetnah he kamah taengah ka sah tih ka hinglu a khahing hil ka thui.
10:2 Pathen taengah, “Kai m'boe sak boeh, balae tih kai nan ho, kai m'ming sak.
10:3 Na kut thaphu na hnawt vaengah halang kah cilsuep dongah na sae tih na hnaemtaek te nang ham then a?
10:4 Hlanghing he na sawt tih na hmuh bangla nang taengah pumsa mik om a?
10:5 Na khohnin he hlanghing khohnin bangla, na kum khaw hlang khohnin bangla om a?
10:6 Te dongah kai kathaesainah te na tlap tih ka tholhnah hnukah nan toem.
10:7 Ka boe pawt tih na kut lamloh a huul thai pawt te na mingnah dongah om pataeng.
10:8 Na kut loh kai n'noih pai tih thikat la kai n'saii akhaw kai nan dolh pawn ni.
10:9 Amlai bangla kai nan saii tih laipi la kai nan mael sak te poek mai lah.
10:10 Suktui bangla kai nan sui tih sukkhal bangla kai nan khal sak moenih a?
10:11 Kai he ka vin ka saa neh nan dah tih ka rhuh neh tharhui neh nan cun.
10:12 Hingnah neh sitlohnah te kai taengah nan khueh tih ka mueihla loh na ngoldoelh a ngaithuen.
10:13 Tedae na thinko ah na khoem he na khuiah tila ka ming.
10:14 Ka tholh sitoe cakhaw kai nan ngaithuen dongah kai kathaesainah lamloh kai nan hmil moenih.
10:15 Ya-oe kai he ka boe akhaw, ka tang akhaw ka lu ka dangrhoek moenih. Yah ka hah tih ka phacip phabaem loh n'yan.
10:16 Sathuengca bangla a phul atah kai nan mae tih kai taengah khobaerhambae la na mael.
10:17 Na laipai neh kai hmai ah nan tlaih tih kai taengah na konoinah na hong. Thovaelnah neh caempuei la kai taengah na pai.
10:18 Balae tih bung khui lamloh loh kai nan poh. Ka pal palueng vetih mik loh kai m'hmu pawt mako.
10:19 A om khaw a om pawt bangla bungko lamloh phuel la n'khuen.
10:20 Ka khohnin he bawn tih a muei la a muei moenih a? Kai lamkah he na dueh na dueh vetih ka ngaidip laem mako.
10:21 Ka caeh hlan vaengah hmaisuep khohmuen neh dueknah hlipkhup la ka mael pawt mako.
10:22 khoyinnah kho tah dueknah hlipkhup a hmuep bangla om tih cikngae pawh. Te dongah a hmuep la sae,’ ka ti ni,” a ti.