Job 9
9:1 Job loh koep a doo tih,
9:2 A tueng te ka ming tangloeng dae hlanghing he Pathen taengah metlam a tang thai eh?
9:3 Amah te oelh ham ngaih cakhaw, anih te thawngkhat ah pakhat long pataeng a doo thai moenih.
9:4 A thinko cueih tih a thadueng khaw len rhapsat. A thuung dongah anih taengah unim aka mangkhak?
9:5 Tlang khaw haimo coeng tih a thintoek ah amih a maelh te khaw ming uh pawh.
9:6 Diklai he a hmuen lamloh tlai tih a tung khaw tuen coeng.
9:7 Khomik te a uen tih thoeng pawh, aisi khaw catui tloep a hnah.
9:8 Vaan ke amah bueng loh a cueh tih tuitunli kah hmuensang dongah a cawt.
9:9 Ning buhol neh airhitbom khaw, tuithim tlungkawt khaw a saii neh.
9:10 Khenah tloel duela hno len a saii tih tae lek pawt hil ah khobaerhambae coeng.
9:11 Kai taeng long a pah mai akhaw ka hmu pawt tih a tinghil akhaw anih te ka yakming moenih.
9:12 Paco cakhaw ulong anih a mael sak? Ulong long anih te, “Balae na saii,” a ti nah?
9:13 Pathen tah a thintoek mael pawt tih Rahab aka bom rhoek khaw a hmui, a hmui ah ngam uh.
9:14 Te dongah anih aisat te kai loh ka doo thai vetih a taengah ka ol ka coelh thai aya?
9:15 Ka tang cakhaw kai lai aka tloek taengah ka doo thai pawt tih rhennah ni ka bih.
9:16 Ka khue tih kai n'doo cakhaw ka ol a hnatun tila ka tangnah moenih.
9:17 Hlithae neh kai kai m'phop tih lunglilungla la ka tloh ping.
9:18 Ka mueihla he mael hamla kai m'pae pawt dae olkhaa ni kai n'kum sak.
9:19 Thadueng dongah khaw len rhapsat tih laitloeknah dongah khaw unim kai aka tuentah he?
9:20 Ka ka neh ka tang akhaw ka boe hae ni, ka cuemthuek cakhaw ka kawn hae.
9:21 Ka cuemthuek dae ka hinglu khaw ka ming pawt tih ka hingnah khaw ka kohnue.
9:22 Te dongah pakhat la, “Cuemthuek neh halang khaw amah loh a khah,” a ti.
9:23 Rhuihet loh a duek sak buengrhuet kae vaengah ommongsitoe kah noemcainah te a tamdaeng.
9:24 Diklai he halang kut ah pae tih a laitloek kah maelhmai te a khuk. Te pawt koinih amah te unim?
9:25 Ka khohnin khaw aka yong lakah bawn tih a yong dongah a then khaw hmuh uh pawh.
9:26 Sangpho canghlong bangla tinghil tih, atha bangla caak dongah cu.
9:27 “Kai he ka kohuetnah ka hnilh pawn eh, ka maelhmai ka hlam saeh lamtah ngaidip saeh,’ ka ti akhaw,
9:28 Ka nganboh he boeih ka rhih tih kai nan hmil mahpawh tila ka ming.
9:29 Kai ka boe coeng dae balae tih a honghi nen he ka kohnue eh?
9:30 Vuelsong tui dongah ka hluk vetih ka kut lunghuem neh ka cil cakhaw,
9:31 vaam khuila kai nan nuem hae vetih ka himbai neh kamah khaw n'tuei uh ni.
9:32 Hlang he kamah bangla a om pawt dongah anih te ka doo koinih laitloeknah la rhenten m'pawk uh ni.
9:33 Mamih laklo ah oltloek tih mamih rhoi soah a kut aka tloeng om pawh.
9:34 A cungkui te kai taeng lamloh a khoe mai vetih a mueirhih loh kai n'let sak pawt mako.
9:35 Ka thui neh anih ka rhih pawt dae kai he kamah taengah te tlam te ka om moenih.