Library · hlt

Job 26

26:1 Job loh a doo tih, 26:2 “Metlam thadueng mueh te na bom tih sarhi aka tak mueh bantha te na khang? 26:3 Metlam lae cueihnah aka tal te na uen tih a cungkuem ah lungming cueihnah na ming sak. 26:4 U taengah nim ol na thui tih nang lamloh u kah hiil nim aka thoeng? 26:5 Sairhai tah tui hmui ah kilkul uh tih kho a sak. 26:6 A taengah saelkhui khaw pumtling om tih Abaddon khaw himbai om pawh. 26:7 Tlangpuei ah hinghong la a yaal tih bang aka om pawt soah khaw diklai a dingkoei sak. 26:8 A khomai khuiah tui a cun tih cingmai te a hmui ah a ueth pawh. 26:9 A cingmai te a soah a yaal tih ngolkhoel hmai a dah. 26:10 Vangnah neh a hmuep laklo kah a khuetnah hamla tui hman ah a rhi a rhuen pah. 26:11 Vaan kah tung khaw hlinghloek uh tih a tluungnah dongah a ngaihmang uh. 26:12 A thadueng loh tuipuei te a phih tih a lungcuei neh Rahab a phop. 26:13 A mueihla loh vaan kah khocil a thoeng sak tih a kut loh yingyet rhul khaw a toeh. 26:14 He tah a longpuei dongkah longpuei hmoi ni he. A thayung thamal kah khohum khuiah amah kah ol duem te metlam n'yaak? A thayung thamal te u long a yakming pai eh?” a ti.