Job 27
27:1 Job loh amah kah a huel ham te a koei tih,
27:2 “Pathen kah hingnah loh kai kah laitloeknah a khoe tih Tlungthang lo ka hinglu a phaep.
27:3 Ka khuikah ka hiil boeih neh ka hnarhong khuikah he Pathen mueihla ni.
27:4 Ka hmuilai loh dumlai thui boel saeh lamtah ka lai loh palyal la caitawk boel saeh.
27:5 Nangmih te kan tang sak atah kai ham savisava. Ka pal duela ka muelhtuetnah he kamah lamloh ka khoe mahpawh.
27:6 Ka duengnah te ka kop vetih ka hlah mahpawh. Kamah tue lamlong tah ka thinko he veet voel mahpawh.
27:7 Ka thunkha te a halang bangla, kai aka tlai thil khaw a boethae bangla om saeh.
27:8 Lailak kah ngaiuepnah tah menim? A mueluem tih Pathen loh a hinglu a bong pah.
27:9 A soah citcai loh a pai vaengah a pangngawlnah te Pathen loh a hnatun nim?
27:10 Tlungthang dongah pang a dok vetih, a tue boeih ah Pathen a khue bitni.
27:11 Pathen kah kut te nangmih kan thuinuet phoe vetih, Tlungthang taengkah te ka phah mahpawh.
27:12 Nangmih boeih khaw na hmuh vaengah balae tih a honghi neh na hoemdawk he.
27:13 Halang hlang loh Pathen taeng lamkah khoyo neh hlanghaeng loh Tlungthang taeng lamkah rho a dang he,
27:14 a ca te cunghang hamla a ping pah tih a cadil cahma khaw buh cung uh mahpawh.
27:15 A rhaengnaeng, a rhaengnaeng te dueknah loh a up vetih a nuhmai rhoek loh rhah uh mahpawh.
27:16 Cak te laipi bangla hmoeng vetih hnicu te dikpo bangla soe ni.
27:17 Tawn cakhaw aka dueng loh a bai vetih cak te ommongsitoe loh a tael ni.
27:18 A im te ning bangla a sak tih dungtlungim bangla rhalrhing a khueh.
27:19 Hlanglen la yalh dae khoem uh mahpawh. A mik a dai dae amah om voel pawh.
27:20 Anih te tui bangla mueirhih loh a phatawt khoyin ah cangpalam loh a pom.
27:21 Anih te kanghawn loh a khuen tih khum. Te vaengah anih te amah hmuen lamloh a yawn.
27:22 Anih te a voeih tih lungma a ti pawt dongah a kut lamloh yong la yong coeng.
27:23 A taengah a kut a paeng uh tih anih te amah hmuen lamloh kut a ving thil.