Library · hlt

Job 5

5:1 Khue laeh nang aka doo om nim? U hlangcim taengah na mael ve. 5:2 Aka ang te konoinah loh a ngawn tih hloih loh thatlainah a duek sak. 5:3 Aka ang loh a yung a hlak ka hmuh vaengah a tolkhoeng buengrhuet ka tap. 5:4 A ca rhoek te khangnah lamloh lakhla tih vongka ah a phop uh vaengah aka huul om pawh. 5:5 A cangah te bungpong loh a caak pah tih hlinghang lamkah a loh dae a thadueng te tuihal loh a mam pah. 5:6 Laipi lamloh boethae thoeng pawt tih diklai lamloh thakthaenah a poe bal moenih. 5:7 Tedae hlang he thakthaenah khuiah a sak tih rhaek ca rhoek bangla ding hang. 5:8 Tedae kai tah Pathen te ka toem vetih Pathen taengah ni ka dumlai khaw ka hal eh. 5:9 A len la a saii vaengah khobaerhambae te khenah lek pawh, tae lek pawh. 5:10 Diklai hman ah khotlan a paek tih lohma li ah tui a hlah. 5:11 Tlarhoel rhoek te hmuensang ah a khueh tih kopang rhoek te khangnah khuila a hoeptlang. 5:12 Aka thaai kah kopoek te a phae tih a kut loh lungming cueihnah saii thai pawh. 5:13 Aka cueih khaw amah kah rhaithinah neh a tuuk tih aka hlang hnuei kah cilsuep he hma paitok. 5:14 Khothaih ah a hmuep neh hum uh tih khothun ah khoyin bangla a phatuem uh. 5:15 Khodaeng te amih ka dongkah cunghang lamlong khaw tlungluen kut lamloh a khang. 5:16 Te dongah tattloel ham ngaiuepnah om dae dumlai loh amah ka a buem. 5:17 Pathen loh a toel hlanghing he a yoethen tih Tlungthang kah thuituennah sit boeh. 5:18 Amah loh a tloh sak dae a hma te a poi pah tih a kut dongah hoeih uh. 5:19 Citcai parhuk lamloh nang n'huul vetih a parhih ah yoethae loh nang soah m'ben mahpawh. 5:20 Nang te khokha vaengah dueknah lamloh, caemtloek vaengah cunghang kut lamloh n'lat ni. 5:21 Olka dongkah rhuihet lamloh n'thuh vetih rhoelrhanah a pai vaengah na rhih mahpawh. 5:22 Rhoelrhanah khui neh khokha rhamling khuiah na luem vetih diklai mulhing te na rhih mahpawh. 5:23 Na paipi te khohmuen lungto taengah om vetih kohong mulhing loh nang taengah n'thuung ni. 5:24 Na dap kah rhoepnah te na ming vetih na tolkhoeng na soep vaengah na hmaai mahpawh. 5:25 Na tiingan muep na ming vetih na cadil cahma te khohmuen baelhing bangla om ni. 5:26 A tue vaengkah canghlom a coi bangla na hminkhah vaengah phuel te na paan ni. 5:27 He tah amah la n'khe uh tangloeng he ne. He he hnatun lamtah namah loh namah dongah ming,” a ti nah.