Library · hlt

Job 6

6:1 Job loh a doo tih, 6:2 Ka konoinah ka thuek, ka thuek vetih ka talnah he cooi dongah ka tloeng rhenten koinih. 6:3 Tuitunli kah laivin lakah n'nan ngawn coeng. Te dongah ka ol he lawn coeng. 6:4 Tlungthang thaltang dongah a sue te ka khuiah ka mueihla loh a mam. Pathen kah hihhamnah loh kai taengah rhong a pai. 6:5 Kohong marhang khaw baelhing soah pang tih, vaito te a kamvuelh soah rhung bal nim? 6:6 Lungkaeh om kolla ankak a caak tih aiduei dakda dongah a hlihlim om aya? 6:7 Amih te ka hinglu loh ben ham a aal tih ka buh khaw kolet la om. 6:8 Ka huithuinah he ulong m'paek vetih a thoeng eh? Tedae ka ngaiuepnah he Pathen long ni m'paek eh? 6:9 Pathen he mulmet vetih kai he m'phop, a kut a hlam vetih kai m'mueluem mako. 6:10 Te vaengah kai ham hloephloeinah om dae lah sue. Te vaengah bungtloh khuiah ka uem mako. Hlangcim te ka phah pawt bangla n'lungma sak pawt mako. 6:11 Ka ngaiuep ham ka thadueng khaw menim? Ka hinglu ka hlawt ham ka hmailong khaw menim? 6:12 Ka thadueng he lungto thadueng nim? Ka saa he rhohumsen a? 6:13 Kai ham he kamah kah bomnah om ngawn pawt tih lungming cueihnah khaw kai lamloh a heh coeng. 6:14 Ngaidaeng loh tlungthang hinyahnah a hnoo vaengah pataeng a baerhoep taengkah sitlohnah a dang van. 6:15 Ka manuca rhoek khaw soklong bangla la hnukpoh tih sokca soklong bangla kak. 6:16 Amih te vueltling loh a nu sak tih vuelsong a yut pah. 6:17 Kho a awlh vaengah a bae neh huu tih amah hmuen lamloh kak uh. 6:18 A caehlong longpuei a hoi uh tih hinghong la a caeh dongah milh uh. 6:19 Tema caehlong kah rhoek loh a paelki uh tih, Sheba lambong amih ham a lamtawn uh. 6:20 A pangtung uh dongah yak uh tih a taengla a pawk uh akhaw a hmai tal. 6:21 A taengah a hong la na om uh van coeng dongah rhihkoi na hmuh vaengah na rhih uh. 6:22 “Kai taengah m'pae uh lamtah na thadueng lamloh kai hamla kapbaih pae uh. 6:23 Rhal kut lamloh kai n'loeih sak lamtah hlanghaeng kut lamloh kai n'lat uh,” ka ti noek a? 6:24 Kai n'thuinuet lamtah ka ngam bitni. Metla ka palang khaw kai he m'ming sak uh. 6:25 Balae tih hlang dueng ol rhap rhap a cal? Nangmih lamloh a tluung ham khaw balae a tluung? 6:26 Olthui te tluung hamla na moeh uh nama? Ol khaw khohli bangla talsae mai pawn ni. 6:27 Cadah ham aisat hmulung na naan vetih na hui hamla na tael pah nim? 6:28 Tedae mulmet uh laeh, kai taengla mael uh. Nangmih maelhmai ah ka laithae nim? 6:29 Mael uh laeh, dumlai la om uh boeh, mael uh laeh, koep mael uh laeh. Ka duengnah he a khuiah om. 6:30 Ka lai dongah dumlai om nim? Ka dang loh talnah yakming pawt maco.