Library · hlt

Job 7

7:1 Diklai hman ah hlanghing hamla caempuei a om moenih a? A khohnin te kutloh kah khohnin banghui ni. 7:2 Sal bangla hlipkhup a hloep tih kutloh bangla a bisai a lamtawn. 7:3 Ka taengah a poeyoek la a hla ka pang van tih thakthaenah hlaem he kai hamla a khueh. 7:4 Ka yalh tih, “Me vaengah nim ka thoh ve?” ka ti. Khoyin loh puh tih hlaemhmah duela yutnah khaw ka cung. 7:5 Ka saa loh a rhit a bai, ka vin laipi tiknong khaw uet tih a tuei. 7:6 Ka khohnin loh tampai lakah bawn tih lungli lungla la ngaiuepnah bawt. 7:7 Ka hingnah mueihla he poek lah. Hnothen hmuh ham khaw ka mik loh mael voel mahpawh. 7:8 Kai aka so mik loh kai m'mae voel mahpawh. Na mik te kai soah om dae kai ka om voel pawh. 7:9 Cingmai loh haai tih cing, saelkhui la aka suntla rhoek tah ha mael tangloeng pawh. 7:10 A im la koep mael pawt vetih a hmuen loh anih hmat voel mahpawh. 7:11 Te dongah kai khaw ka ka tuem mahpawh. Ka mueihla khobing doela ka thui vetih. Ka hinglu khahing doela ka lolmang pueng ni. 7:12 Kai he tuipuei tuihnam tih nim kai soah thongim na khueh. 7:13 Ka soengca kai n'hloep bitni, ka thingkong loh ka kohuetnah te a phueih bitni ka ti. 7:14 Mueimang neh kai nan rhihyawp sak tih olphong neh kai nan let sak. 7:15 Ka hinglu loh ka rhuhrhong lakah khaknah neh dueknah ni a. coelh. 7:16 Ka kohnue coeng, kumhal duela ka hing mahpawh, kai he n'toeng laeh, ka khohnin khaw a honghi ni. 7:17 Mebang hlanghing lae amah na pantai sak tih a taengah na lungbuei na khueh te. 7:18 Anih te mincang ah na cawh tih mikhaptok ah ni anih te na loepdak. 7:19 Balae tih kai lamloh na mangthong pawt eh? Ka timtui ka dolh hil kai nan rhael moenih. 7:20 Hlang aka kueinah nang taengah ka tholh tih balae ka saii? Balae tih kai he na kutnoek la nan khueh. Te dongah kai ham tah hnorhih la ka om coeng. 7:21 Te dongah ka boekoek he na phueih tih kai kathaesainah he nan khoe mai pawt lae? Laipi khuila ka yalh pawn ni. Kai na toem cakhaw ka om voel moenih,” a ti nah.