Job 8
8:1 Shuhi Bildad loh a doo tih,
8:2 “He he me hil nim na thui ve? Na ka kah ol tah khohli bangla khuet coeng.
8:3 Pathen loh tiktamnah he a khun sak tih Tlungthang loh duengnah te a khun sak mai a?
8:4 Na ca rhoek te anih taengah a tholh vaengah amih te amamih kah boekoek kut dongla a tueih.
8:5 Namah loh Pathen te na toem tih Tlungthang te na hloep mak atah,
8:6 Na cil tih na thuem koinih nang yueng la haenghang vetih na duengnah rhamtlim te n'thuung pataeng pawn ni.
8:7 Na tongnah te a yiit om cakhaw na hmailong te muep rhoeng ni.
8:8 Lamhma kah cadil taengah dawt laeh lamtah a napa rhoek khenah te soepsoei laeh.
8:9 Mamih loh n'hlaem paek kah long khaw m'ming uh moenih, mamih kah khohnin diklai dongkah mueihlip banghui ni.
8:10 Amih te na thuinuet pawt tih a, nang taengah a thui vetih amih kah lungbuei lamloh olthui te a khueh eh?
8:11 Nongtui pawt ah talik thawn tih tui om mueh ah capu rhoeng a?
8:12 Te te a duei pueng ah a hlaek pawt akhaw sulrham boeih hmai ah rhae coeng.
8:13 Pathen aka hnilh boeih kah caehlong neh lailak kah ngaiuepnah tah bing tangloeng.
8:14 A uepnah neh a pangtungnah bumba im te khaw bawtboeng.
8:15 A im dongah hangdang dae pai thai pawh. Te te a kuel dae thoo pawh.
8:16 Anih te khosae li ah thingsup tih a dum ah a dawn sai.
8:17 A yung loh lungkuk dongah a ven tih lungto im te a hmuh.
8:18 Te te a hmuen lamloh a phuk van vaengah, “Nang kam hmu moenih,” anih te a namnah.
8:19 He he a longpuei kah omthennah coeng koinih laipi tloe lamloh a poe uh khaming.
8:20 Pathen loh cuemthuek hnawt ngawn pawt tih thaehuet kut te a moem moenih.
8:21 Na ka dongah nueihbu neh na hmui dongah tamlung bae.
8:22 Na lunguet rhoek loh yahpohnah a bai uh vetih halang kah dap tah om mahpawh,” a ti.