Library · hlt

Proverbs 7

7:1 Ka ca ka olthui he ngaithuen lamtah ka olpaek he na taengah khoem ne. 7:2 Ka olpaek he ngaithuen lamtah hing puei. Ka olkhueng he na mikhmuh ah thenhnaih la om saeh. 7:3 Te te na kutdawn dongah hlaengtang lamtah na lungbuei cabael dongah daek lah. 7:4 Cueihnah te, “Ka ngannu nang tah,” ti nah lamtah yakmingnah te pacaboeina la khue. 7:5 Rhalawt nu taeng lamkah khaw, kholong nu kah hoem ol lamkah khaw namah aka ngaithuen ham ni. 7:6 Ka im bangbuet kah thohhuel long ka dan. 7:7 Te vaengah hlangyoe rhoek te ka hmuh tih cadong ca rhoek khuiah a lungbuei aka talh khaw ka yakming. 7:8 Huta imdak kah bangkil te a paan tih huta im kah longpuei la luei. 7:9 Hlaemhmah ah, khothun kholaeh ah, khoyin yinthuem neh khohmuep ah khaw, cet. 7:10 Anih aka doe ham huta ngawn tah pumyoi hnisui neh a lungbuei a uep coeng ke. 7:11 Tekah huta tah hue a sak tih a im ah khaw a thinthah. A khopha khaw duem pawh. 7:12 Tahae nawn ah imkawt ah, tahae ah toltung neh bangkil takuem ah rhongngol coeng. 7:13 Tekah cadong te a sol tih a mok, a maelhmai khaw a cadong ham a tanglue pah tih cadong te, 7:14 Kamah taengkah rhoepnah hmueih neh tihnin ah tah ka olcaeng te ka thuung coeng. 7:15 Te dongah nang doe ham neh na mikhmuh ah toem hamla ka mop tih nang kam hmuh tangloeng. 7:16 Ka soengca te Egypt hnitang, cenlang, hniphaih neh ka phaih coeng. 7:17 Ka thingkong dongah murrah, thingul, thingsa ka khueh thil coeng. 7:18 Halo lah a hlo neh mincang duela hmilhmal sih lamtah, pumnai neh yoka sih. 7:19 Tongpa loh a im ah om pawt tih khohla ah yiin la cet coeng. 7:20 A kut dongah tangka cun a khuen tih hlalum hnin ah ni a im la ha pawk eh?,” a ti. 7:21 Anih te a rhingtuknah cungkuem neh a yoek tih a hmuilai kah hamsum neh a heh. 7:22 Te dongah huta hnukah maeh la aka poeh vaito bangla, aka ang thuituennah dongkah khocin rhui bangla cet. 7:23 Vaa loh pael khuila a kun paitok bangla a thin te thaltang loh a khoh pah duela a hinglu te ming pawh. 7:24 Te dongah ca rhoek loh kai ol he hnatun uh lamtah ka ka dongkah olthui he hnatung uh laeh. 7:25 Anih kah longpuei la mael boeh, na lungbuei te anih kah a hawn la khohmang sak boeh. 7:26 Anih loh hmalaem la muep a cungku sak tih aka tlung rhoek khaw boeih a ngawn coeng. 7:27 A im khaw saelkhui longpuei ah om tih dueknah imkhui la suntla pai.