Library · hlt

SIR 17

17:1 Boeipa loh hlang hing diklai lamloh a suen tih, amih te diklai la koep a mael sak. 17:2 Amih te a khohnin khaw rhep a khueh pah coeng, Tedae diklai dongah cungkuem boeih soah saithainah a khueh pah. 17:3 Amih te a khuiah amah bangla thaomnah a khueh pah tih, amih te amah mueiloh la a suen. 17:4 Amah loh mulhing boeih kah ko khuiah hlang rhihnah a khueh pah, Ramsa neh vaa soah uknah khaw hlang taengah a paek. 17:5 Te rhoek loh Boeipa loh yaknganah panga a paek, a parhuknah dongah tah hmatthainah, A parhihnah dongah a thuicaihnah ham mingnah a paek. 17:6 Hlang taengah boesoepnah, lai neh mik khaw, hna neh poeknah ham lungbuei khaw a paek. 17:7 Hlang dongah mingnah neh yakmingnah a bae sak tih, a thae neh a then khaw a tueng. 17:8 Boeipa rhihnah he amah loh hlang thinko ah a khueh pah, A bibi dongkah a khuetnah te khaw hlang a hmuh sak coeng. 17:9 A mih loh a cuenah dongkah a ming cim te a koeh tih, 17:10 a bibi aka nguel coeng te khaw phong uh saeh. 17:11 Amah loh hlang soah mingnah te a up tih, hingnah olkhueng te a yo sak. 17:12 Amah loh hlang taengah dungyan paipi a sai tih, A taengah a oltloek te a phoe pah. 17:13 Hlang mik loh Boeipa kah a boeimang thangpomnah a hmuh tih, a hna long khaw thangpomnah ol te a yaak coeng. 17:14 Hlang taengah, “A thae boeih te ngaithuen,” a ti nah. Te dongah a imben kawng dongah khaw olpaek te rhip a paek. 17:15 Hlang kah longpuei teh Boeipa taengah phoe yoeyah, te dongah a mikhmuh lamloh thuh uh thai pawh. 17:16 A camoe lamkah a khoboe rhoe mah a thae la hoi uh coeng, a thiko lungto bangla aka ning te khaw, ngasen lungbuei la a coeng sak uh thai moenih. 17:17 Amah loh namtom boeih kah ukkung a khueh, Tedae Israel tah Boeipa amah kah hamsum la om. 17:19 Amih kah bibi te Boeipa mikhmuh ah khomik bangla phaeng tueng. Amih kah khoboe Boeipa mik dongah boeih om. 17:20 Amih kah boethae boeih te Boeipa hmuh ah a thuh tloel, Te dongah amih kah tholhnah tah Boeipa taengah phoe. 17:21 Boeipa amah tah a then dongah Amih te metla a suen khaw boeih a ming tih hnawt mahpawh, Voei bal pawt vetih amih te a rhen bal pueng ni. 17:22 Doedannah aka khueh tah Boeipa taengah, kutbuen kutnoek bangla om tih. A sitloh hlang te tah a mik dongkah thaihthawn la, amah loh loh a khoem a bael ni. 17:23 Te phoeiah amih te a thoh vetih a thung pueng ni, Te vaengah amih tholhphu te amih lu soah a tloeng pah ni. 17:24 Te cakhaw aka yut rhoek tah a taengla a mael sak tih, Ngaiuepnah aka bawt rhoek khaw koep a hloep. 17:25 Boeipa taengla mael lamtah na tholhnah te voei laeh, a mikhmuh ah thangthui lamtah na khoboe khaw hlawt laeh, 17:26 Khohni taengla mael lamtah boethae lamloh mael laeh, Amah loh a tuei te tah thinah saloel laeh. 17:27 Saelkhui ah u long Khohni koehnah a sak vetih, mulhing rhoek kah a hmuen ah u long a uem eh? 17:28 Duek lamkah he tah aka om mueh taengkah bangla uemnah he khaw paltham mai ta. Aka hing rhoek long tah Boeipa koehnah khaw a then la a sak. 17:29 Boeipa kah rhennah neh a taengla aka mael rhoek ham, khodawkngainah he len tangkik rhoe pai. 17:30 Hlanghing kah a noengnah he a cungkuem moenih, te dongah hlanghing puet aka nguel la om pawh. 17:31 Khomik lakah balae aka sae bal voel? Te pataeng hmuep pueng ta. Pumsa neh thii aisat he boethae long la a hmil. 17:32 Boeipa tah vaan sosang kah caempuei rhalboei ni. Tedae hlang hing boeih tah laipi hmaiphu la om.