SIR 18
18:1 Yoeyah la aka hing mah loh lunglai boeih a suen, Boeipa bueng ni tiktam la aom.
18:2 A kut dongkah canghloeng neh diklai a kilh, Te dongah cungkuem loh Boeipa ol te a ngai.
18:3 A thaomnah dongah hno cungkuem kah manghai la om tih, A cim boeih te a tihnai khui lamloh a paek a boe.
18:4 A bibi te doek hamla u khaw thaomnah a paek moenih, U long khoboe aka khuet te a thuep thai eh?
18:5 Boeimang thaomnah te u long a nueh thai? A rhennah te u long boeih a tae thai eh?
18:6 Te rhoek te thap neh yueh ham khaw a coeng moenih, Boeipa kah khobae rhambae te tah ham khaw coeng pawh.
18:7 Hlang kah hmakhah la a om vaengah, a tongnah lam ni a om uh. Duem uh coeng a ti vaengah, a lukil uh pueng.
18:8 Hlang he metlam a om ti, amih te metlam a hnonah A khui ah balae a then aka om tih, balae aka thae?
18:9 A hinglung a sen tloe om cakhaw, kum yakhat ni a pha coeng atah khotoe coeng.
18:10 Tuitunli kah tui cip neh laivin laivai bangla, kumhal khohnin he tah kum setca mai ni.
18:11 Te dongah ni amih taengah Boeipa loh a thinsen tih, amih soah a rhennah a lun pah.
18:12 Hlang kah a bawtnah he citcai la a om khaw, amih loh a hmuh tih a hmat. Te dongah ni amih taengah khodawkngainah te cungkuem la muep a khueh pah.
18:13 Hlang kah thinphoei lungvat tah imben hambueng la om, Boeipa kah thinphoei lungvat tah mulhing boeih ham la om. Te dongah amih te a ho tih, a hlinsai tih, a thuituen, Te phoeiah tudawn bangla a tuping te a mael puei.
18:14 Amah kah rhilam aka doe boeih neh a khosing dongah aka tlungmu rhoek soah thinphoei lungvat a khueh.
18:15 Ka ca, na khoboe then te hohmunnah neh thoek boeh, na kutdoe te khaw ol ling neh poeih boeh.
18:16 Kholing kholai khaw buemtui loh a dingsuek sak, Te dongah ol then he kutdoe lakah then ngai.
18:17 Ol ding he tah kutdoe then lakah oe ngai, Te rhoi te tah moeihoeih taengah ni m'hm uh.
18:18 Hlang ang long tah moeihoeih pawt la a khotoh nah, kopoek thae kah kutdoe loh hlang mik a hmaang sak.
18:19 Na thui hlanah cang lamhma dae, na tloh hlanah na sadingnah te ngaithuen.
18:20 Laitloeknah a pai hlanah namah nuemnai uh, N'cawh tue vaengah khodawkngainah na hmuh bitni.
18:21 Boethae na puei hlan ah tlayae lamhma dae, Te daengah ni na tholh lamloh na yut thai eh.
18:22 Olhlo na khueh phetlet vaengah kanghalhnah om boelsaeh, te lamloh na loeih ham khaw an dueknah hil rhing aih boeh.
18:23 Ol na hlo hlanah namah te rhoekbah uh laeh, Boeipa aka noemcai hlang bangla om boeh.
18:24 Boeipa kah kosi ne dueknah hnin kah hamla poek, Tawnlohnah hnin tah a maelhmai te a hoi pawn ni.
18:25 Khobuh tue vaengah khokha tue khaw poek, Khuehtawn khohnin ah khodaeng neh vawtvainah khaw poek.
18:26 Mincang lamloh hlaem duela a hmuethma thovael uh, Boeipa mikhmuh ah a cungkuem he vil khoe uh.
18:27 Aka cueih tah cungkuem dongah a ngai-huet, Tholhnah loh boeih vael cakhaw, a thae khui lamloh tuem uh.
18:28 Lungming hlang long tah cueihnah a ming, Te donah cueinah aka hmuh te a koeh uh.
18:29 Olka aka ming thai tah amah khaw cueih, Te dongah thuidoeknah khaw a tha thai.
18:30 Na kongaih te vai boel lamtah, na huengaih te khaw tuem mai.
18:31 Na hinglu te namah kongaih bueng na vai sak koinih, na thunkha rhoek kah nueibu la na om ni.
18:32 Pangdoknah dongah khaw hmae aih boeh, vaksaknah loh khodaeng la n'khueh ve.
18:33 Na sungkoi te a hong la na khueh vaengah tangka pu neh kho na tue koinih, buhbih la na om het mahpawt nim?