Library · lus

Job 39

39:1 Lung bang sathar no neih hun i hria em ni? Sazuk no neih hun i chhinchhiah thei em ni? 39:2 An pai chhung thla zat i chhiarin, An hrin hunte i hria em ni? 39:3 An bawk a, no an hring a, An vei zo mai a ni. 39:4 An note chu an pian a tlang a, Ram palailengah an thang lian a, An kal darh a, an puite hnenah an kir tawh lo. 39:5 Ram sabengtung tuin nge zawl chhuah? Ram sabengtung chak thlunna tu phelh nge? 39:6 An awmna'n thlaler ka ruatsak a, An chenna'n ram tau; 39:7 Khawpui hulum chu a hmusit a, Khaltu au ri a hre ngai lo 39:8 A tlatna tlangpui dung a ni a, Thil hring apiang a zawng chhuak thin. 39:9 I tan selepa chu chhawr theih em ni ang? I ran inah a riak duh ang em? 39:10 Lei lehnaah hrui i bahtir thei ang em? I hnungah lei ruam a rawn chawk rual ang em ni? 39:11 A chak em avang maiin i ring thei dawn em ni? I hna chu i kawltir dawn em ni? 39:12 I buhte i hruih zawla rawn dah khawm turin I ring mai thei em ni? 39:13 Ostrich thla uangthuang takin a inkhawng vel a; mahse, a thla ki leh a hmulte chu an ngilnei em ni? 39:14 Leiah a tui a hnutchhiah a, Vaivutah a khuh lum a, 39:15 Miin a rap keh thei a, Ramsaten an chil keh thei tih a hre leh tawh lo. 39:16 Ama no ni lo ang hrimin a note lakah a inchhu ngawng a, A thiltih chu a thlawn dawn emaw, a pawisa chuang lo. 39:17 Pathianin finna a haihchhamtir a, Hriatthiamna a pek hek loh avangin. 39:18 Tlan bo tuma a han insingsak meuh chuan Sakawr leh a chungchuangte chu a tham lo mai. 39:19 Sakawr chaknate hi i pek em ni? A nghawngah thahrui i ban em ni? 39:20 Khau anga kat turin i siam em ni? A hnar tum dur dur hlauhawmzia te hi! 39:21 Phai ruamah a ke a phiat tlut tlut a, A tha a so a, indo hriamhrei hmachhawn turin a chhuak a; 39:22 Hlauh reng a hre lo a, a zam ngai lo a, Khandaih lakah a tim ngai hek lo. 39:23 A chungah thla bawm a ri rawk rawk a, Fei leh thal a tle zawr zawr mai a. 39:24 Hlauhawm tak leh thinur takin a khawh puat puat a, tawtawrawt thawmah a ding hle hle thei lo. 39:25 tawtawrawt a rik phawt chuan, "Chei, Chei,' a ti a. Inbeihna chu hla takah a rim a hria a, Hotute rawl leh inbeihna hawhaw nen. 39:26 I finna avangin mu chu a thlawk chhoin Chhim lamah thla a zar em ni? 39:27 Muvanlai thlawk chho leh sang taka bu a chhep hi i thupek em ni? 39:28 Kham kovahte an cheng a, Lung tohlawt hmun him takah a riak thin. 39:29 chuta tang chuan ei tur a bihthla a, A mit chuan hla tak a hmu.A note pawhin thisen an dawt a, Saruang awmnaah chuan a awm zel a ni. 39:30 A note pawhin thisen an dawt a, Saruang awmnaah chuan a awm zel a ni.