Library · my

Psalms 83

83:1 အို ဘုရားသခင်​၊ နှုတ်ဆိတ်​နေ​တော်​မ​မူ​ပါ​နှင့်​။ အို ဘုရားသခင်​၊ တိတ်ဆိတ်​စွာ​နေ​တော်​မ​မူ​ပါ​နှင့်​။ ငြိမ်သက်​စွာ​နေ​တော်​မ​မူ​ပါ​နှင့်​။ 83:2 အကြောင်းမူကား ကိုယ်တော်​၏​ရန်သူ​တို့​သည် ဆူပူသောင်းကျန်း​ကြ​ပြီး ကိုယ်တော်​ကို​မုန်း​သော​သူ​တို့​သည် ခေါင်း​ထောင်​လာ​ကြ​ပါ​၏​။ 83:3 သူ​တို့​သည် ကိုယ်တော်​၏​လူမျိုး​တော်​အပေါ် ဉာဏ်နီဉာဏ်နက်​ထုတ်​၍ ကိုယ်တော်​ကာကွယ်​ထား​သော​သူ​တို့​အပေါ် လျှို့ဝှက်ကြံစည်​ကြ​ပါ​၏​။ 83:4 သူ​တို့​က “​လာ​ကြ​၊ အစ္စရေး​ဟူသော​အမည်နာမ​ကို နောက်တစ်ဖန် အောက်မေ့စရာ​အကြောင်း​မ​ရှိ​စေရန် သူ​တို့​ကို လူမျိုး​တစ်​မျိုး​အဖြစ်​မှ ပယ်ဖျက်​ကြ​ကုန်စို့​”​ဟု ဆို​ကြ​ပါ​၏​။ 83:5 အမှန်စင်စစ် သူ​တို့​သည် စိတ်သဘော​တညီတညွတ်တည်း​ဖြင့် လျှို့ဝှက်ကြံစည်​ကြ​၍ ကိုယ်တော်​ကို​ဆန့်ကျင်​လျက် မဟာမိတ်​ဖွဲ့​ကြ​ပါ​၏​။ 83:6 ထို​သူ​တို့​တွင် ဧဒုံ​ပြည်သား​များ​နှင့်​ဣရှမေလ​လူမျိုး​များ​၊ မောဘ​ပြည်သား​များ​နှင့်​ဟာဂရိ​လူမျိုး​များ​၊ 83:7 ဂေဗလ​လူမျိုး​၊ အမ္မုန်​လူမျိုး​နှင့်​အာမလက်​လူမျိုး​များ​၊ တိုင်ရာ​မြို့သား​များ​နှင့် ဖိလိတ္တိ​ပြည်သား​များ ပါဝင်​ကြ​ပါ​၏​။ 83:8 အဆီးရီးယား​လူမျိုး​တို့​သည်​လည်း သူ​တို့​နှင့်အတူ​ပူးပေါင်း​လျက် လောတ​၏​အမျိုးအနွယ်​များ​အတွက် လက်ရုံး​အင်အား​ဖြစ်​ကြ​ပါ​၏​။ 83:9 မိဒျန်​လူမျိုး​အပေါ်​၌​လည်းကောင်း​၊ ကိရှုန်​ချောင်း​နားတွင် သိသရ​နှင့်​ယာဘိန်​မင်းကြီး​တို့​အပေါ်​၌​လည်းကောင်း ကိုယ်တော်​ပြု​သကဲ့သို့ သူ​တို့​အပေါ်​၌ ပြု​တော်မူ​ပါ​။ 83:10 သူ​တို့​သည် အင်္ဒေါရ​အရပ်​တွင် ဖျက်ဆီး​ခြင်း​ခံရ​၍ မြေကြီး​ပေါ်မှ မြေဆွေး​ဖြစ်​ကြ​ပါ​ပြီ​။ 83:11 သူ​တို့​၏​မင်းအရာရှိ​တို့​ကို ဩရဘ​မင်းကြီး​နှင့်​ဇေဘ​မင်းကြီး​ကဲ့သို့​လည်းကောင်း​၊ သူ​တို့​၏​မင်းညီမင်းသား​အပေါင်း​တို့​ကို ဇေဘဟ​မင်းကြီး​နှင့် ဇာလမုန္န​မင်းကြီး​ကဲ့သို့​လည်းကောင်း ဖြစ်စေ​တော်မူ​ပါ​။ 83:12 ထို​သူ​တို့​က “​ဘုရားသခင်​ပိုင်​သော​စားကျက်​များ​ကို ငါ​တို့​အတွက်​သိမ်းယူ​ကြ​ကုန်စို့​”​ဟု ဆို​ကြ​ပါ​၏​။ 83:13 အို အကျွန်ုပ်​၏​ဘုရားသခင်​၊ သူ​တို့​ကို လေတိုက်ရာ​သို့​လုံးထွေး​လိမ့်ပါ​သွား​တတ်​သော ချုံပင်​ကဲ့သို့​လည်းကောင်း​၊ လေတိုက်​ရာ​သို့​လွင့်ပါ​သွား​တတ်​သည့် ကောက်ရိုးမျှင်​ကဲ့သို့​လည်းကောင်း ဖြစ်​စေ​တော်မူ​ပါ​။ 83:14 မီး​သည် တော​ကို​လောင်​သကဲ့သို့​လည်းကောင်း​၊ မီးလျှံ​သည် တောင်​ကို လောင်ကျွမ်း​သကဲ့သို့​လည်းကောင်း​၊ 83:15 ကိုယ်တော်​၏​မုန်တိုင်း​အားဖြင့် သူ​တို့​ကို​လိုက်လံညှဉ်းဆဲ​၍ ကိုယ်တော်​၏​လေပွေ​အားဖြင့် သူ​တို့​ကို​ထိတ်လန့်​စေ​တော်မူ​ပါ​။ 83:16 အို ထာဝရဘုရား​၊ သူ​တို့​သည် ကိုယ်တော်​၏​နာမ​တော်​ကို​ရှာ​ကြ​စေရန် သူ​တို့​၏​မျက်နှာ​ကို အရှက်ကွဲ​ခြင်း​နှင့်​ပြည့်​စေ​တော်မူ​ပါ​။ 83:17 သူ တို့​သည် ထာဝစဉ်​အရှက်ကွဲ​၍ ထိတ်လန့်​ကြ​ရ​ပါစေသော​။ မျက်နှာပျက်​၍ ပျက်စီး​ကြ​ရ​ပါစေသော​။ 83:18 ထိုသို့ဖြင့် ထာဝရဘုရား​ဟူသော​နာမ​တော်​ရှိ​သည့် ကိုယ်တော်​တစ်ပါးတည်း​သာလျှင် ကမ္ဘာမြေ​တစ်ခွင်လုံး​၌ အမြင့်ဆုံး​သော​အရှင်​ဖြစ်ကြောင်း​ကို သူ​တို့​သိ​ကြ​ပါစေသော​။