Library · pcm

2 Chronicles 3

3:1 Solomon kon start to build God Temple for Jerusalem on-top Mount Moraya, di place where God for appear to en papa David, but na Araunah wey kom from Jebus, get der before. 3:2 Solomon don dey rule for four years wen e start to build for di sekond day for di sekond mont. 3:3 Di foundashon wey Solomon build for God Temple long rish 90 fit (akordin to as dem dey measure before) and wide rish 30 fit. 3:4 Di varanda for di main hall front na 30 fit, while di temple wide and high rish 30 fit. Solomon design inside di temple with pure gold. 3:5 E make di main hall with board wey dem make from evagreen trees; design am with fine gold kon dekorate am with palm trees and shains. 3:6 E dekorate di temple with precious stones and na from Parvaim dem from bring di gold wey e use. 3:7 E still design di house, di beams, di wall, di post and all di doors wey dey di temple and e karve tins wey bi like angel for di walls. 3:8 E make di Most Holy Place long rish 30 fit, while di temple wide and deep rish 30 fit too. E design am with fine gold wey dear rish 600 silva koin. 3:9 Di nail for di gold heavy rish 50 shekel and e still design di up with gold. 3:10 For di Most Holy Place, e make two image wey bi like angel kon design dem with gold. 3:11 If dem put di angels feada togeda, e rish 30 fit. One for di first angel feada long rish seven and half fit and e tosh one wall for di temple; why di oda feada na still seven and half fit and e dey tosh di sekond angel feada. 3:12 One for di sekond angel feada still long rish seven and half fit and e dey tosh di oda wall for di temple; di oda feada na still seven and half fit and e dey tosh di first angel feada. 3:13 If yu add di two angel feada togeda, na 30 fit dem bi. Dem stand well face inside di temple. 3:14 Na violet, purpol, crimson and white klot, Solomon take make di curtain kon design and dekorate am with tins wey bi like angels. 3:15 For di temple front, e make two pila and dem long rish fifty-two and half fit and each of dem high rish seven and half fit. 3:16 E make strong shains kon put dem on-top di pila. E still make one hundred fruits wey get many seeds kon dekorate and join dem to di shains. 3:17 E put di pila for di temple front; one for di rite side and di oda for di left, den e koll di one for rite, “Jakin” and di left one, “Boaz.”