Job 34
34:1 Elihu still sey:
34:2 “Wise men, make una listin to my words; Make una hear mi, men wey know well-well.
34:3 Una know betta food wen una put am for mout, but una ear nor know wise word wen e hear am.
34:4 So make wi choose wetin dey rite. Make wi know among awasef wetin dey good.
34:5 Job sey en know do bad tin and God nor gri defend am.
34:6 E sey, ‘As I dey rite so, make I lie sey I dey wrong? Dem nor fit heal my wound, even doh I nor sin at-all.’
34:7 Yu don si any man wey bi like Job wey dey tok anyhow?
34:8 E like make bad pipol dey stay with am and e dey waka with sinnas.
34:9 E sey pesin nor dey gain anytin, if e dey obey God.
34:10 “Men wey dey undastand, make una listin to mi! God Almighty go fit do wetin dey wrong?
34:11 E dey reward pipol for wetin dem do and dey trit dem as dem deserve.
34:12 True-true, God nor dey do bad tin; E dey judge evribody as e suppose bi.
34:13 Abi God get en pawa for anoda place? Na somebody tell am sey make E kare for di world?
34:14 If God remove di breath wey dey give us life,
34:15 den evribody wey dey live for dis life go die kon turn to san.
34:16 “Naw, make yu listin to mi. If yu get undastandin, make yu hear mi.
34:17 So yu dey tok sey God nor dey rite naw? Yu feel sey E hate justice?
34:18 God dey kondemn kings and rulers wey wiked and nor dey yuzful.
34:19 E nor dey support rulers or rish pipol against poor pipol, bikos na-im kreate all of dem.
34:20 Pesin fit die for nite just like dat, but God nor dey struggol to distroy pipol wey tink sey dem get pawa.
34:21 God dey si evritin wey wi dey do. E dey si evry step wey wi take.
34:22 E nor get as di darkness tick rish, e nor fit hide sinnas from God.
34:23 Wi nor fit set di time wey God go take judge all of us.
34:24 E nor nid pesin to tell am anytin, before E go remove leader kon put anoda pesin for en post.
34:25 Bikos E know wetin di leader do. E fit ova-trow and skata dem for nite.
34:26 E dey ponish sinnas bikos of dia sin and na for where evribody go for si dem,
34:27 bikos dem don stop to follow en laws and kommand.
34:28 Dem make poor pipol dey kry to God and E don hear dia koll for help.
34:29 If God sey E nor go do anytin, nobody go fit ask am kweshon. If E hide en face, wi nor go get help at-all weda na one pesin or di hold kountry.
34:30 God dey do like dis, so dat wiked pipol nor go rule and opress di pipol.
34:31 “Wetin make pipol nor dey konfess dia sins give God kon promise sey dem nor go sin again;
34:32 den tell mi my fault so dat I nor go do dem again?
34:33 Job! Na yor choice, nor bi mi go tell God wetin yu wont, bikos yu don rijet all dis tin. Naw, make yu tell us wetin yu dey tink.
34:34 True-true, anybody wey get sense go gri and if wise man hear mi, e go tok sey,
34:35 Job just dey tok, bikos e nor know wetin e dey tok and all wetin e dey tok, nor make sense.
34:36 But I wish sey dem test Job rish di end, bikos e dey ansa like wiked pesin.
34:37 E don add trobol join e sins, bikos for awa front, e dey klap en hand and dey akuiz God.”