Job 5
5:1 “Job, make yu koll naw, if anybody go ansa yu? Na who dey holy wey yu won go meet?
5:2 Na vexnashon dey kill who nor get sense and na jealousy dey kill fool.
5:3 I don si sey fool fit dey progress, but na wons wahala go kom distroy evritin wey e get.
5:4 Dia shidren nor dey save; no lawyer dey to defend dem for kourt.
5:5 Doz wey dey hongry go chop wetin di fool dem plant; grass go grow kover wetin dem plant. Pipol wey get long-trot, go tif dia propaty.
5:6 Evil nor dey grow from dust or trobol from groun.
5:7 But just as lite dey shine go up, na so too dem born pesin enter trobol.
5:8 “But if na mi, I go look for God kon komplain gi-am.
5:9 Wi nor go fit know di great tins wey E dey do and en wonders nor get end.
5:10 E dey give rain to di eart and wota for di san.
5:11 Na God dey karry doz wey dey honbol go up and give joy to doz wey dey mourn.
5:12 E skata and make sure sey wayo pipol nor fit do wetin dem plan!
5:13 E dey katch pipol wey feel sey na dem get sense pass kon end dia wayo work.
5:14 Dem dey waka for darkness for day time. For aftanoon, dem dey waka dey find road like sey dem dey darkness.
5:15 But na God dey save poor pipol from deat. E dey save doz wey nor get, from doz wey get pawa.
5:16 E dey give hope to di poor kon silent wiked pipol.
5:17 Na blessing dey follow di man wey God korrect! So make yu nor komplain wen God dey ponish yu for yor sins.
5:18 God go kover where E for wound yu; na en hand wound yu and na dat same hand E go take heal yu.
5:19 E go save yu from trobol six times and wen e rish di sevent one, evil pipol nor go fit tosh yu.
5:20 Wen honga kom, E go keep yu alive; wen war kom, E go protet yu, so dat yu nor go die.
5:21 God go diliver yu from trobol; E go save yu wen distroshon kom.
5:22 Yu go laf trobol and honga; yu nor go fear wiked animals again.
5:23 Di land wey yu klear go dey free from stones and wild animals nor go kom near am.
5:24 Peace go dey yor house and wen yu look yor propaty, evritin go komplete.
5:25 Yu go get many shidren! Dem go plenty like grass for dis eart.
5:26 Just as rice dey wait until den won harvest am, na so too yu go old before yu die.
5:27 Job, wi don study dis tin wey dey happen and wi know sey na true. So, hear dis words make yu use am for yor own good.”