Library · pcm

Psalms 41

41:1 Na blessing go follow doz wey dey do good for poor pipol! God dey always save dem from trobol. 41:2 Make God protet and keep dem alive. Make E make dem prosper for di land and save dem from dia enemies. 41:3 God dey kare for dem wen dem dey sick kon make dem well again. 41:4 My God, I dey pray sey, “Make Yu sorry for mi. Make Yu heal mi, bikos I don sin against Yu.” 41:5 Na only bad-bad tins my enemies dey tok about mi. Dem dey ask, “Wen e go take die make pipol forget am?” 41:6 Dem dey visit mi like sey dem bi my friends, but na wikedness full dia heart and wen dem komot from where I dey, dem go-go spoil mi give evribody. 41:7 Pipol wey hate mi dey tok for each oda ear about mi and na only bad tins dem dey tink about mi. 41:8 Dem sey, “E get some bad-bad diziz. E nor go ever get up from dat bed!” 41:9 Even my best friend, di one wey I trust with evritin; pesin wey wi dey chop togeda, don turn against mi. 41:10 So Oga God, make Yu sorry for mi. Make I well again, so dat I go pay dem back! 41:11 Like dis, I know sey I dey make belle sweet Yu, bikos Yu neva let my enemies win mi. 41:12 Instead, Yu don keep my life, bikos I dey innocent; Yu don let mi enter yor present forever. 41:13 So make una praiz di Oga wey bi Israel God, bikos E dey alive forever and ever. Amen!