Library · pcm

Psalms 77

77:1 I shaut and kry to my God; yes I shaut and E hear mi! 77:2 Wen I dey trobol, I look for God. Thru-out di nite, I pray and lift my hand go heaven, but nor-tin fit konfort my soul. 77:3 Wen ever I tink of God, na kry I always dey kry make E kom help mi. 77:4 Yu nor dey let mi sleep and I too dey weak to pray! 77:5 I bin dey tink of di good days before-before, 77:6 wen betta song with joy full my nite. But naw, I dey look my life kon dey tink and si how e dey difren. 77:7 So God don rijet mi forever? E nor go ever show mi en love again? 77:8 En love wey nor dey fail don go forever? E promise don fail finish? 77:9 God don forget to dey sorry for pesin? E don klose di door to pipol wey dey kom meet am for help? 77:10 So I kon sey, “Na mi kause am! Na mi let God turn en hand against mi” 77:11 But my Oga God, I remember evritin wey Yu don do. I remember all di wonderful tins wey Yu do before. 77:12 Dem always dey my mind and I nor fit stop to dey tink about di mighty tins wey Yu do. 77:13 My God, yor ways dey holy. E get any god wey get pawa like Yu? 77:14 Na Yu bi God wey dey do great wonders! Yu dey show yor great pawa among di nashons. 77:15 With yor hand, Yu save yor pipol wey bi Jakob and Josef shidren-shidren. 77:16 My God, wen di Red Sea si Yu, di wota kon dey fear and di sea shake rish bottom. 77:17 Rain fall kom down from di kloud and tonda nois full di sky, den yor arrow with lite kon dey shine. 77:18 Dem hear yor vois like tonda from di strong wind, di lite make di world dey shine and di world kon dey shake with fear. 77:19 Yu waka on-top di sea go diliver yor pipol kon strol pass di great river, but nobody fit si yor footstep bikos e nor show at-all. 77:20 Den Yu use Moses and Aaron take lead and guide yor pipol like many sheep.