Proverbs 3
3:1 My pikin, make yu nor forget wetin I tish yu and always remember wetin I sey make yu dey do.
3:2 Wetin I tish yu go make yu prosper and get long life.
3:3 So make yu always get faith and dey honbol; tie trut and mesi round yor neck kon rite dem for yor heart.
3:4 If yu do like dat, both God and human being go dey happy and favor yu.
3:5 Make yu always dey trust God with all yor heart, but nor trust wetin yu tink sey yu know.
3:6 Always dey remember God kommand for anytin wey yu dey do, den E go show yu di korrect way.
3:7 Nor tink sey yu wise pass di way yu bi, but just obey God and nor do bad tins.
3:8 If yu do like dis, yor body go dey okay and yor bones go strong well-well.
3:9 Honor God with yor money kon offa di first fruit wey yu harvest from yor farm gi-am.
3:10 If yu do so, korn go full yor store and yu go get plenty wine to keep.
3:11 My pikin, if God korrect yu, listin well and take am as warnin.
3:12 Bikos God dey korrect only di pipol wey E love, just as papa dey korrect di pikin wey e dey proud of.
3:13 Pesin wey wise and get undastandin, na happiness go bi en own.
3:14 Undastandin get gain pass silva and e betta pass gold.
3:15 Wisdom get value pass gold and e nor get anytin wey yu fit use take kompare am.
3:16 E go give yu long life, plenty propaty and honor.
3:17 E go still make yor life sweet and yu go dey save.
3:18 Wisdom na tree wey dey give life and e dey make pipol wey kom meet am, happy.
3:19 God kreate di eart with en wisdom and na en undastandin E take make di heavens.
3:20 Na en wisdom make river dey flow and na-im dey make kloud bring rain kom di eart.
3:21 So my pikin, whole di wisdom and undastandin wey yu get well and yu nor ever let dem live yu.
3:22 Dem go make yu live sweet and happy life. Dem go bi like betta shain for yor neck.
3:23 Dem go make yu dey save for anytin wey yu dey do and yu nor go ever fall.
3:24 Fear nor go katch yu wen yu dey sleep and yu go sleep well still day break.
3:25 Yu nor nid to worry about wahala wey go just happen, just as e dey go meet wiked pipol.
3:26 God go save yu and E nor go let trap katch yu.
3:27 Anytime wey yu fit, make yu do good to pipol wey nid am.
3:28 Nor ever tell yor neighbour make e wait till tumoro, if yu know sey yu fit help am naw.
3:29 Nor ever plan bad against yor neighbour, bikos doz wey dey stay near yu, trust yu.
3:30 Nor argue with pesin just bikos yu won argue, wen yu know sey e nor do yu bad.
3:31 Nor jealous or bigin bihave like pipol wey like wahala well-well,
3:32 bikos God hate pipol wey dey do evil, but E dey draw raitious pipol near body.
3:33 God don curse wiked pipol house, while blessings full raitious pipol own.
3:34 God nor get wetin E won do with proud pipol, but E dey favor pipol wey dey honbol.
3:35 Pipol wey wise go get good name, but fools go only add trobol join dia disgrace.