Library · yue

馬太福音 10

十二使徒

1 耶穌召集十二門徒嚟,賜佢哋驅逐邪靈同醫治各種疾病嘅權力。

2 以下係十二使徒嘅名:第一個係西門(別字彼得),與及佢嘅細佬安得烈,西庇太嘅仔雅各,同雅各嘅細佬約翰,

3 腓力,巴多羅買,多馬,收稅嘅馬太,亞勒腓嘅仔雅各,達太,

4 激進黨嘅西門,與及出賣耶穌嘅加略人猶大。

十二使徒嘅使命

5 耶穌打發呢十二人出去,吩咐佢哋話:「唔好到外邦人嘅地區,亦唔好入撒馬利亞人嘅城市。

6 你哋要去以色列人中迷失嘅羊羣處。

7 要喺所到嘅地方宣講:『天國快實現咯!』

8 你哋要醫治有病嘅,使死人復生,痲瘋病人得潔淨,將鬼趕逐。你哋白白得嚟嘅,亦要白白施出去。

9 錢袋裏唔使帶金、銀、銅幣;

10 出門唔使帶旅行袋或兩件內衣,亦唔使帶鞋同手杖。因為工人得供應係應該嘅。

11 你哋到一個市鎮或鄉村時,先打聽嗰處有邊個願意接待你哋,就住喺佢家中,直到你哋離開嗰處。

12 你哋入佢家時,要請佢安。

13 若呢家人歡迎你哋,你哋為佢哋求嘅平安就會臨到呢家。若佢哋唔歡迎你哋,你哋所求嘅平安就歸返你哋。

14 嗰啲唔歡迎你哋、.唔聽你哋話嘅家或城,你哋離開之時,就將腳上嘅塵拍去。

15 我實在話你哋知,喺審判日,所多瑪同蛾摩拉所遭受嘅懲罰比嗰個地方所受嘅重容易受呀!」

將來嘅迫害

16 「聽住!我打發你哋出去,好比羊入狼羣之中。你哋要好似蛇咁機警,白鴿咁溫柔。

17 你哋要防備人,因為佢哋將拘捕你哋,帶你哋上法庭,又喺佢哋嘅會堂鞭打你哋。

18 為我嘅緣故,你哋將被帶到統治者同君王面前受審判,向佢哋同外邦人見證福音。

19 你哋被審問時,唔好擔心要講啲乜嘢,或係要點樣對答;到嗰時,上帝會指示你哋應該講嘅話。

20 因為你哋所講嘅,唔係自己嘅話,係你哋天父嘅靈藉你哋講嘅。

21 兄弟將出賣兄弟,置佢哋於死地;父親亦將噉樣對待仔女;仔女將同父母作對,並且害死佢哋。

22 為我嘅名,眾人要憎恨你哋;但係忍耐到底嘅人必然得救。

23 佢哋若係喺呢個城逼迫你哋,你哋就逃去另一個城。我實在話你哋知,你哋未走勻以色列嘅城市,人子就到咯。

24 學生不能高過老師,奴僕不能高過主人。

25 所以,學生同老師一樣,奴僕同主入一樣,亦應該滿足。若一家嘅主人被當做鬼王別西卜,家裏其他嘅人豈唔係要受更大嘅凌辱咩?」

應該怕嘅係邊個

26 「所以,唔好怕人,一切隱藏嘅事都會被張揚出嚟,秘密嘅事亦會被洩露。

27 我喺暗中話你哋知嘅,你哋要喺光天白日之下講出;你哋私下聽到嘅話,亦要當眾宣佈。

28 殺得肉體、但唔能夠殺滅靈魂嘅,你哋唔使怕佢哋;要怕嘅係上帝;因為只有佢能夠將人嘅肉體同靈魂都扔落地獄。

29 兩隻麻雀用一銅錢買得到,但係你哋嘅天父若唔許可,一隻都唔會跌落地。

30 至於你哋,連你哋嘅頭髮都被數過。

31 所以,你哋唔使怕,你哋比好多麻雀貴重得多!」

認或唔認基督

32 「凡喺人面前認我嘅,我喺我天父面前亦認佢;

33 凡喺人面前唔認我嘅,我喺天父面前亦唔認佢。」

和平或紛爭

34 「唔好以為我係帶和平到世上嚟嘅;我並冇帶嚟和平,而係帶嚟刀劍。

35 我嚟係使人對佢父親不和,女對佢母親不和,媳婦對佢嘅家婆不和。

36 人嘅仇敵就係自己嘅家人。

37 愛父母多過愛我嘅,唔配跟從我;愛仔女多過愛我嘅,唔配跟從我;

38 唔肯背起自己嘅十字架跟從我嘅,亦唔配造我嘅門徒。

39 凡想保存自己生命嘅,反喪失生命;凡為我喪失生命嘅,就得到生命。」

論賞賜

40 「人接待你哋就係接待我;接待我就係接待打發我嚟嘅嗰位。

41 因某人係先知而接待佢嘅,必會分享先知所得嘅賞賜;因某人係義人而接待佢嘅,亦必會分享義人嘅賞賜。

42 我實在話你哋知,無論係邊個,就算拎一杯清水俾門徒中最微小嘅一個飲,因佢係我嘅門徒,就必會得到賞賜。」