馬太福音 11
施洗約翰嘅門徒嚟見耶穌1 耶穌指示十二門徒嘅話講完,就離開嗰處,繼續到附近各城傳道教訓人。
2 施洗約翰喺監獄聞得基督所做嘅事,就打發佢嘅門徒去見耶穌,問佢話:
3 「你就係約翰所講必要嚟嘅嗰一位,抑或我哋重要等待另一位呢?」
4 耶穌答話:「你哋返去,將你哋所聽聞、所睇見嘅,報告俾約翰,
5 即係:盲嘅得見,跛嘅會行,痲瘋嘅得潔淨,耳聾嘅得聽聞,死人復生,窮人有福音傳俾佢哋。
6 凡對我唔疑惑嘅人有福咯!」
7 約翰嘅門徒去後,耶穌向羣眾講論約翰話:「你哋以前去曠野搵約翰時,想睇嘅係乜嘢呢?係睇風吹蘆葦咩?
8 你哋究竟出去睇乜嘢呢?係睇衣着華麗嘅人咩?着呢種衣服嘅人係住喺王宮裏!
9 噉樣,你哋出去睇乜嘢呢?睇先知咩?我話你哋知,冇錯,佢比先知重大。
10 佢係聖經提嘅嗰一位。上帝話:『睇吖!我打發我嘅使者喺你面前為你開路。』
11 我實在話你哋知,婦人所生嘅未有比約翰大,但係喺天國,最微小嘅都比約翰偉大呀!
12 由約翰開始傳道到今日,天國遭受到猛烈嘅攻擊,強暴嘅人企圖奪取佢。
13 眾先知書同摩西嘅律法講論天國嘅事,直到約翰為止;
14 若你哋願意接受所講嘅預言,約翰就係嗰個要嚟嘅以利亞。
15 有耳可聽嘅,就應當聽!
16 至於此世代嘅人,我要用乜嘢嚟比喻呢?佢哋好比喺街上玩嘅兒童,其中嘅一羣向另一羣叫話:
17 『我哋為你哋奏婚禮樂曲,你哋唔跳舞!我哋唱喪禮哀歌,你哋亦唔痛哭!』
18 約翰嚟,唔飲唔食,人話:『佢係被鬼迷嘅!』
19 人子嚟,又飲又食,人就話:『佢係酒肉之徒,係稅吏同罪人嘅朋友!』但係,上帝嘅智慧係由佢智慧嘅果子顯明出嚟。」
不信嘅城20 嗰時,耶穌責備嗰啲曾經睇見佢行過好多神蹟嘅城市,因為嗰處嘅人冇離棄佢哋嘅罪惡。
21 佢話:「哥拉汛呀,你有禍咯!伯賽大呀,你有禍咯!我喺你哋中行遍嘅神蹟若行喺推羅同西頓,嗰處嘅人早就披麻蒙灰,表示棄邪歸正咯。
22 我實在話你哋知,喺審判日,推羅同西頓受嘅懲罰比你哋所受嘅重容易呀!
23 迦百農呀,你要將自己捧上天咩?你會被扔落地獄呀!我喺你處行過嘅神蹟若係行喺所多瑪,佢重可以存留到今日!
24 但我話你哋知,喺審判日,所多瑪受嘅懲罰比你受嘅重容易受呀!」
到我呢處嚟25 嗰時,耶穌話:「父呀,天地嘅主,我感謝你;因為你向聰明、有學問嘅人所隱藏嘅事,就向嗰啲冇學問嘅人啟示出嚟。
26 父呀,係嘅,噉樣嘅安排係出於你嘅美意。
27 我父已將一切俾過我。除父之外,冇人認識子;除子同子所願意啟示嘅人,亦冇人認識父。
28 凡勞苦、擔重擔嘅人可以嚟我處,我就使你哋得安息。
29 你哋要孭起我嘅軛,學習我,因為我心柔和謙卑。噉樣,你哋嘅心就得安息。
30 我嘅軛係自在嘅;我嘅擔係輕省嘅。」