Library · yue

馬太福音 9

耶穌醫好瘋癱病人

1 耶穌上船,過湖,返到佢自己嘅城。

2 有人抬一個瞓喺床上嘅瘋癱病人嚟佢面前。耶穌見佢哋嘅信心,就對瘋癱病人話:「仔呀,放心喇,你嘅罪得赦咯!」

3 有幾個經學教師心裏話:「此人講褻瀆上帝嘅話!」

4 耶穌知佢哋嘅心意,就問:「你哋點解懷邪惡嘅念頭呢?

5 對此人話『你嘅罪得赦』?抑或話『你起身行』邊樣容易呢?

6 我要向你哋證明,人子喺地上有赦罪嘅權。」於是對個瘋癱病人話:「起身拎起你嘅床,返屋企喇!」

7 嗰個人就起身,返屋企。

8 睇見嘅人都驚慌起嚟;佢哋頌讚上帝,因為佢將噉嘅權能賜俾人。

馬太蒙召

9 耶穌離開嗰處再向前行,睇見一個收稅嘅,名叫馬太,坐喺稅關。耶穌對佢話:「嚟跟從我!」馬太就起身,跟從佢。

10 耶穌喺馬太家中食飯時,好多稅吏同罪人亦嚟;佢哋同耶穌及佢嘅門徒一齊食飯。

11 有啲法利賽人睇見,就對耶穌嘅門徒話:「點解你哋嘅老師同稅吏及罪人一齊食飯呢?」

12 耶穌聽見就話:「健康嘅人唔使睇醫生,有病嘅人致需要。

13 聖經話:『我要嘅係仁慈,唔係祭牲。』你哋去研究呢句話嘅意思喇!因為我嚟嘅目的唔係要召好人,而係要召罪人。」

禁食嘅問題

14 有一次,施洗約翰嘅門徒嚟問耶穌:「我哋同法利賽人時時禁食,你嘅門徒總唔禁食,點解呢?」

15 耶穌答話:「新郎重喺婚宴時,賀喜嘅客人會悲傷咩?當然唔會。但係日子將到,新郎從佢哋中被帶走,嗰時佢哋就必禁食咯。

16 冇人拎新布去補舊衣服,因為新補落去嘅會扯爛嗰件舊衣服,使裂痕更大。

17 冇人將新酒裝喺舊皮袋。若係噉,皮袋會脹破,酒漏出,連皮袋都損壞。要將新酒裝喺新皮袋;噉就兩樣都得保全。」

會堂主管嘅女同患血漏嘅女人

18 耶穌正喺處向約翰嘅門徒講呢哋話時,有一個猶太會堂嘅主管嚟見佢,跪喺佢面前,話:「我個女死咗,求你去為佢按手,使佢返生。」

19 耶穌起身,跟住佢去;耶穌嘅門徒亦一齊去。

20 有個女人患咗十二年血漏;佢走到耶穌背後,摸下佢外袍嘅衣角。

21 佢心裏想:「只要我摸到佢嘅衣角,我一定會好返。」

22 耶穌轉過身,睇見佢,就對佢話:「女呀,放心喇,你嘅信心救咗你!」就喺嗰時,女人嘅病就好返。

23 耶穌嚟到主管嘅屋企,睇見出殯嘅吹鼓手同好嘈雜嘅人羣,

24 就對佢哋話:「你哋都出去,呢個女仔未死,不過瞓着!」眾人都譏笑佢。

25 人羣被趕出後,耶穌入女仔嘅睡房,拉住佢嘅手,佢就起身。

26 於是呢啲消息傳遍整個地區。

醫好兩個盲人

27 耶穌離開嗰處,再向前行。有兩個盲人跟住佢,大聲叫話:「大衛嘅子孫呀,可憐我哋喇!」

28 耶穌入咗屋,兩個盲人嚟到佢面前,佢就問佢哋:「你哋信唔信我能夠做呢件事呢?」佢哋答話:「主呀,我哋信。」

29 於是,耶穌摸佢哋嘅眼,話:「照你哋嘅信心,為你哋成全喇!」

30 佢哋嘅眼就開返。耶穌鄭重吩咐佢哋:「唔好將此事話俾任何人知!」

31 但係,佢哋出去就將耶穌嘅事傳遍喺嗰一帶地方。

醫好啞巴

32 佢哋出去時,有人帶一個被鬼迷嘅啞巴到耶穌面前。

33 個鬼被趕出之後,嗰個人就能講話。眾人都好驚奇,話:「喺以色列,我哋從未見過噉樣嘅事。」

34 但係,法利賽人話:「佢係靠鬼王嚟趕鬼嘅。」

耶穌對人民嘅愛心

35 耶穌周遊各市鎮鄉村,喺各會堂教訓人,傳天國嘅福音,醫治民間各種疾病。

36 佢睇見一羣羣嘅人,就可憐佢哋;因為佢哋困苦流離,好似冇牧人嘅羊羣一樣。

37 於是,佢對門徒話:「要收成嘅好多,但係收割嘅工人太少。

38 你哋要祈求農場嘅主人,打發工人出去收割佢嘅農作物。」