馬太福音 17
改變形像1 六日後,耶穌帶住彼得雅各同約翰兩兄弟靜靜上去高山。
2 喺佢哋面前,耶穌嘅形像改變;面貌好似日頭一樣明亮,衣服好似光一樣潔白。
3 忽然,三個門徒睇見摩西以利亞同耶穌講話。
4 彼得對耶穌話:「主呀,我哋喺呢處真係好!若你願意,我就喺呢處搭三座棚,一座俾你,一座俾摩西,一座俾以利亞。」
5 彼得正講呢啲話時,有光明嘅雲遮住佢哋;有聲由雲裏傳出話:「呢個係我嘅愛子,我喜愛佢。你哋要聽從佢!」
6 門徒聽見呢啲聲,非常驚慌,都蹼喺地上。
7 耶穌走過嚟,摩吓佢地,話:「起身,唔使怕!」
8 佢哋抬頭一望,只見耶穌,其他嘅人都唔見。
9 佢哋落山時,耶穌吩咐佢哋:「喺人子未從死者中復生以前,唔好將所睇見嘅異象話俾人知。」
10 於是門徒問耶穌:「點解經學教師話以利亞必須先嚟呢?」
11 耶穌答話:「以利亞係要先嚟準備一切。
12 但係我話你哋知,以利亞已經嚟過,但人唔認識佢,反而任意對待佢。人子亦會噉受佢嘅虐待。」
13 門徒噉致明白耶穌呢啲話係指施洗約翰講嘅。
醫好被鬼迷嘅兒童14 佢哋返到羣眾處,有一個人嚟,跪喺耶穌面前,
15 話:「主呀,求你可憐我嘅仔!佢患癲癇病,非常痛苦,多次跌落火裏,又多次跌落水裏。
16 我帶佢去見你嘅門徒,但係佢哋唔能夠醫好佢。」
17 耶穌話:「冇信心!及腐敗嘅世代呀!我要喺你哋處幾耐呢?又要容忍你哋幾耐呢?帶佢嚟我處!」
18 於是耶穌責備個鬼;鬼就出嚟,個仔嘅病立刻好返。
19 事後,門徒私下嚟問耶穌:「點解我哋不能將嗰隻鬼趕出去呢?」
20 耶穌答話:「因為你哋嘅信心唔夠。我實在話你哋知,假如你哋嘅信心好似一粒芥菜種咁大,就算對呢座山話:『由呢處移到嗰處!』佢亦會移過去。冇任何事係你哋唔能做嘅。」
21 (有啲古卷加21節:至於呢一種鬼,只有靠禁食、禱告致趕得出去。)
耶穌再預言自己嘅死22 門徒集合喺加利利時,耶穌對佢哋話:「人子將被交喺人手裏,
23 佢哋必殺佢;但係,第三日佢就復生。」門徒聽咗非常憂愁。
繳納聖殿稅24 耶穌同門徒嚟到迦百農時,有一個徵收聖殿稅嘅人嚟見彼得,問佢:「你哋嘅老師納唔納聖殿稅呢?」
25 彼得答話:「當然納。」彼得入屋時,耶穌先問佢:「西門,邊個向呢個世上嘅君王繳納關稅或人頭稅,係本國嘅公民吖?抑或外國人呢?你嘅意見點樣?」
26 彼得話:「外國人!」耶穌話:「噉樣,本國嘅公民可以免稅。
27 但係我哋唔好得罪呢班人。你到湖邊釣魚,將釣上嚟嘅第一條魚拎嚟,打開佢嘅口,你會發現一個錢幣;呢啲錢足夠繳納你同我嘅聖殿稅,你就拎去俾佢哋喇。」