Library · yue

馬太福音 18

邊個最偉大

1 嗰時,門徒嚟問耶穌:「喺天國邊個最大?」

2 耶穌就叫一個孩子嚟,叫佢企喺佢哋中間,

3 話:「我實在話你哋知,除非你哋改變,好似孩子一樣,你哋絕不能成為天國嘅子民。

4 好似此孩子噉樣謙卑嘅,喺天國裏就係最大嘅。

5 為咗我而接待噉樣嘅孩子,就係接待我。」

罪嘅誘惑

6 「任何人使信徒中一個最微小嘅離棄我,倒不如用大磨石掛喺佢嘅頸,浸佢落深海。

7 呢個世界竟有使人離棄我嘅事,幾咁悲慘呀!噉嘅事固然會發生,但係造呢種事嘅人有禍咯!

8 若你一隻手或者一隻腳使你犯罪,就斬佢落嚟,扔咗佢。缺手缺腳而得永生,比手腳齊全而被扔入永不熄滅嘅烈火中好得多呀。

9 若你一隻眼使你犯罪,挖佢出嚟,扔咗佢。只有一隻眼得永生,比雙眼齊全被扔落地獄嘅火裏好得多。」

迷羊嘅比喻

10 「你哋要小心,唔好輕視任何一個最微小嘅人。我話你哋知,喺天上,佢哋嘅天使時常侍立喺我天父面前。

11 (有啲古卷加11節;因為人子嚟嘅目的係要拯救失喪嘅人。)

12 你哋試想,假如一個人有一百隻羊,其中一隻迷失咗,唔通佢唔留落九十九隻喺山野,去搵嗰隻迷失嘅羊咩?

13 我實在話你哋知,佢搵到呢隻迷失嘅羊一定非常高興,比佢有嗰九十九隻冇迷失嘅羊高興得多!

14 同樣,你哋嘅天父唔願意任何一個最微小嘅人迷失。」

對待犯過錯嘅兄弟

15 「假使你嘅兄弟得罪你,你就去見佢,指出佢嘅錯誤;但係要喺佢同你單獨嗰時致噉樣做。若佢聽你嘅勸告,你就得返你嘅兄弟。

16 若佢唔聽,你就約請其他一兩個人一齊去;使每一句話都有兩三個人做證。

17 若佢仍然唔聽,就將呢件事嘅始末向教會報告。佢對教會亦唔聽從嘅話,你就將佢當做外人或稅吏看待好咯。」

禁止同准許

18 「所以,我實在話你哋知,你哋喺地上所禁止嘅,喺天上亦禁止;你哋喺地上所准許嘅,喺天上亦准許。

19 我再話你哋知,你哋中有兩個人在地上同心合意祈求,無論求乜嘢,我嘅天父必為你哋成全。

20 因為,無論喺乜嘢地方,有兩三個人奉我嘅名聚集,我就喺佢哋中間。」

唔饒恕人嘅惡僕

21 嗰時,彼得嚟問耶穌:「主呀,我嘅兄弟得罪我,我應該饒恕佢幾次呢?七次夠未?」

22 耶穌話:「唔係七次,係七十個七次。

23 因為天國好比以下嘅故事;有一個王要同佢嘅臣僕結帳。

24 佢開始算帳時,有人將一個欠佢一千萬銀嘅臣僕帶到佢面前。

25 因為呢個人冇錢還債,王就下令將佢賣做奴隸,連同佢嘅妻、仔女,同一切所有嘅都要賣嚟還債。

26 個僕人喺王面前跪低,哀求話:『請寬容我喇!我一定會將一切債務都還清。

27 王可憐佢,免佢嘅債,而且將佢釋放。

28 「嗰個僕人出去之後,遇見一個同伴。呢個同伴欠佢十兩銀,佢就捉住佢,揸住佢嘅喉嚨,話:『將欠我嘅錢還俾我!』

29 佢嘅同伴跪低,哀求佢話:『請寬容我,我一定會還清嘅!』

30 佢唔肯,反而押佢落監,等佢還清欠款。

31 其他同伴睇見呢件事嘅經過都好憂愁;佢哋去見王,將呢件事嘅始末向佢報告

32 於是王叫嗰個僕人嚟,對佢話:『你呢個惡奴,你向我要求,我就免你所有嘅債,

33 你唔應該寬容你嘅同伴,好似我寬容你一樣咩?』

34 王十分忿怒,將佢關入監獄受刑,等佢還清全部嘅債。」

35 耶穌話:「若你哋唔肯真心饒恕兄弟,我天父亦噉樣待你哋。」