馬太福音 19
有關休妻嘅事1 耶穌講完呢啲話,就離開加利利,返去約但河對岸嘅猶太地區。
2 有一大班人跟從佢,佢就喺嗰處醫好佢哋嘅病人。
3 有啲法利賽人嚟見耶穌,想陷害佢,問佢:「我哋嘅律法係唔係准丈夫用任何理由休妻呢?」
4 耶穌答話:「你哋冇讀過呢段經文咩?『太初,創造主造男又造女。』上帝話:
5 『因此,人要離開父母,同妻結合,兩人成為一體。』
6 嘅然噉,夫妻唔再係兩個人,而係一體。所以,上帝所配合嘅,人唔可以分開。」
7 法利賽人問佢:「噉樣,點解摩西俾我哋一條誡命,話丈夫俾妻一張休書就可以休佢呢?」
8 耶穌答話:「摩西准你哋休妻 ,係因為你哋心腸太硬;但喺創世之初並唔係噉嘅。
9 我話你哋知,除非妻不貞,任何人休妻,再去同另一個女人結婚,就係犯姦淫。」
10 門徒話:「既然丈夫同妻嘅關係係噉樣,就不如唔結婚重好。」
11 耶穌答話:「噉樣嘅教訓唔係人人都能接受嘅,只有得到上帝特別恩賜嘅人致能接受呮。
12 因為人唔結婚嘅理由好多;有啲係生嚟唔適宜結婚嘅;有啲係人為嘅原因不能結婚;另有啲係為天國嘅理由唔結婚。能接受呢啲教訓嘅人就接受喇!」
祝福小孩13 有人帶小孩嚟見耶穌,請耶穌同佢哋按手禱告;門徒就責備嗰啲人。
14 耶穌話:「由得小孩嚟我處,唔好阻止佢哋,因為天國嘅子民正係好似佢哋噉樣嘅人。」
15 於是,耶穌同佢哋按手,然後離開嗰處。
青年財主16 有一次,有人嚟見耶穌,話:「老師,我做啲乜嘢善事致能夠得到永生呢?」
17 耶穌答話:「你點解問我關於『善』嘅事呢?只有一位係善嘅。若你想得到永生,就應該遵守誡命。」
18 佢就問:「邊啲誠命呢?」 耶穌話:「不可殺人;不可姦淫;不可偷竊;不可作假證;
19 要孝敬父母;愛人如己。」
20 青年答話:「呢一切誡命我都已遵守,重要做啲乜嘢呢?」
21 耶穌話:「若你想達到更完全嘅地步,要去賣你所有嘅產業,將錢賙濟窮人,你就會有財富積存喺天上;然後嚟跟從我。」
22 個青年聽見呢啲話,就垂頭喪氣噉走咗,因為佢非常富有。
23 於是,耶穌話佢嘅門徒知;「我實在話你哋知,有錢人想成為天國嘅子民係好難呀!
24 我再話你哋知,有錢人想成為上帝國嘅子民,比駱駝穿過針眼重困難呀!」
25 門徒聽見呢啲話,十分驚奇,就問:「噉樣講?邊個能得救呢?」
26 耶穌定眼望住佢哋話:「在人係不能;但在上帝,凡事都能。」
27 彼得問話:「我哋已經捨棄一切嚟跟從你,我哋將得到乜嘢呢?」
28 耶穌對佢哋話:「我實在話你哋知,喺將來嘅新時代,人子坐喺榮耀寶座上時,你哋跟從我嘅人都坐喺十二寶座上,審判以色列嘅十二支派。
29 凡為我嘅緣故捨棄房屋、兄弟、姊妹、父母、仔女,或田地嘅,都會得到百倍嘅酬報,而且重得到永生。
30 但係,有好多在先嘅,將要在後;好多在後嘅,將要在先。」