馬太福音 20
葡萄園中嘅工人1 天國好比下面嘅故事:有一個葡萄園主清早出去,請工人到佢嘅葡萄園做工。
2 約定照常例每日俾佢哋一塊銀幣,然後打發佢哋到葡萄園做工。
3 上午九點鐘左右,佢再到市場,睇見有啲人企喺處,無所事事,
4 就對佢哋話:『你哋亦入去葡萄園做工喇;我會俾你哋公道嘅工資。』
5 佢哋就去。後來,中午十二點鐘同下午三點鐘,佢又出去,照樣請咗一啲工人。
6 下午將近五點鐘,佢又到市上,睇見重有啲人企喺處,就問佢哋:『點解成日企喺呢處無所事事呢?』佢哋答話:
7 『因為冇人請我哋。』佢就對佢哋話:『你哋都入去葡萄園做工喇。』
8 「到挨晚時,園主對領班話:「叫工人嚟,分發工資俾佢哋,由最後入嚟嘅先支,到首先入嚟嘅支完為止。』
9 嗰啲五點鐘致嚟做工嘅,每個人領取一個銀幣。
10 輪到嗰啲最早嚟做工嘅人嚟領工資,佢哋以為一定會得多啲,但喺每一個人亦只得到一個銀幣。
11 佢哋得到之後,就埋怨主人;話:
12 『呢啲最後入嚟嘅人只做一小時嘅工,但我哋成日喺烈日下辛苦噉做,而你支俾佢哋嘅竟然同支俾我哋嘅一樣!』
13 園主答佢哋中嘅一個話:『朋友,我並冇唔公道待你呀。你唔係同意每日一個銀幣嘅工資咩?
14 拎你嘅錢回家去喇!我俾嗰啲最後入嚟嘅同俾你嘅一樣,
15 唔通我無權使用自己嘅錢咩?因為我待人慷慨,你就嫉妒咩』」
16 於是耶穌話:「噉樣,嗰啲在後嘅,將要在先;而在先嘅,將要在後。」
耶穌第三次預言自己嘅死17 耶穌上去耶路撒冷時,帶埋十二門徒,一面行一面話佢哋知:
18 「你地要知道,我哋現在上去耶路撒冷,人子將被交喺祭司長同經學教師嘅手裏。佢哋要判佢死刑,
19 然後將佢交俾外邦人。佢哋要戲弄佢,鞭打佢,將佢釘十字架;第三日,佢就復生。」
母親嘅請求20 西庇太嘅妻帶住兩個仔嚟見耶穌,向佢下拜,請求一件事。
21 耶穌問佢:「你要乜嘢呢?」佢答話:「求你答應,喺你做王時,俾我兩個仔,一個坐喺你嘅右邊,一個坐喺你嘅左邊。」
22 耶穌答話:「你哋唔知祈求嘅係乜嘢。我將要飲嘅苦杯,你哋能飲咩?」佢哋答話:「我哋能飲!」
23 耶穌話:「你哋固然要飲我嘅苦杯,但係我冇權決定邊個坐喺我嘅左右。呢啲座位,我父為邊個預備就屬於邊個。」
24 其他十個門徒聽見噉嘅請求,對呢兩兄弟非常惱怒。
25 耶穌叫佢哋嚟,話:「你哋知道,世上嘅人有執政者有權管轄佢哋,有領導者操權管束佢哋。
26 但係,你哋就唔係噉樣。你哋中邊個要做大嘅,就要做你哋嘅僕人;
27 邊個要做領袖嘅,就要做你哋嘅奴僕。
28 正如人子嚟,唔係受人服事,而係服事人,而且為救贖大眾獻出自己嘅生命。」
醫好兩個盲人29 佢哋離開耶利哥時,一大班人跟住耶穌。
30 有兩個盲人坐喺路邊,一聽見耶穌經過,就大聲叫:「主呀!大衛嘅子孫,可憐我哋喇!」
31 眾人責備佢哋,唔准佢哋出聲;但係佢哋越發大聲叫:「主呀,大衛嘅子孫,可憐我哋喇!」
32 耶穌停落,叫佢哋嚟,問話:「你哋要我為你哋做乜嘢?」
33 佢哋答話:「主呀,請你使我哋嘅眼能睇見!」
34 耶穌可憐佢哋,摸佢哋嘅眼;佢哋立刻睇見,就跟從耶穌。