馬太福音 2
東方嘅訪客1 希律做王時,耶穌降生喺猶太嘅伯利恆城。有幾位星象家從東方來到耶路撒冷;
2 佢哋問:「出生嚟做猶太人王嘅喺邊處?我哋喺東方睇見佢嘅星,故此嚟拜佢。」
3 希律王聽聞,心裏極之不安;全耶路撒冷城嘅人亦同樣不安。
4 於是希律召集所有祭司長同經學教師,問佢哋:「基督應該喺邊處出世?」
5 佢哋答話:「喺猶太嘅伯利恆,因為先知曾噉樣寫:
6 猶太嘅伯利恆呀,你喺猶太各城中並非最細嘅;因為有一位領袖要從你處出嚟,牧養我嘅子民以色利。」
7 於是,希律靜靜召見呢幾位由東方嚟嘅星象家,向佢哋查問嗰粒星出現嘅準確日子。
8 然後吩咐佢哋去伯利恆,話:「你哋去,仔細尋訪嗰個嬰孩,搵到就嚟向我報告,等我亦去拜佢。」
9 聽見呢啲話,佢哋就離開。此時,喺東方見嘅星又出現,而且喺前頭引導佢哋,一直嚟到嬰孩出生嘅地方上面就停止。
10 佢哋睇見嗰粒星,真係歡喜快樂。
11 佢哋入屋,睇見嬰孩同佢母親馬利亞,就俯伏朝拜嬰孩,然後打開寶盒,拎出黃金、乳香、沒藥等禮物獻俾佢。
12 喺夢中,上帝指示佢哋唔好返去見希律,佢哋就從另一條路返去自己嘅家鄉。
逃去埃及13 佢哋走咗之後,主嘅天使喺約瑟嘅夢中顯現,話:「起身!帶住嬰孩同佢母親逃去埃及,住喺嗰處,直到我吩咐你離開;因為希律要搵呢個嬰孩,來殺害佢。」
14 於是,約瑟起身,漏夜帶個仔同佢母親逃去埃及,住喺嗰處,
15 直到希律死咗。此事應驗主透過先知講嘅話:「我從埃及將我嘅仔召出嚟。」
屠殺嬰兒16 希律見自己受咗星象家嘅愚弄,非常憤怒,就依照佢向星象家打聽到嗰粒星出現嘅時候,派人將伯利恆同附近嘅地區兩歲以下嘅男嬰都殺死。
17 噉就應驗先知耶利米所講話:
18 喺拉瑪聽聞深傷大哭嘅聲。拉結為佢嘅仔女哀哭,唔肯接受安慰,因為佢哋都死。
從埃及返嚟19 希律死後,主嘅天使在埃及於夢中顯現過約瑟話:
20 「起身!帶個仔同佢母親返去以色列,因為嗰啲想殺害呢個嬰孩嘅人已經死。」
21 於是約瑟起身,帶個仔同佢母親返去以色列。
22 約瑟因為聽聞亞基老繼承佢父親希律做猶太王,就唔敢去嗰處。後來,主又喺約瑟嘅夢中指示佢,佢就避開,去加利利省,
23 喺一個叫拿撒勒嘅城定居。噉就應驗先知講嘅話:「佢將稱為拿撒勒人。」