Library · yue

馬太福音 3

施洗約翰傳道

1 嗰時,施洗約翰嚟到猶太曠野傳道。

2 佢話:「離棄罪惡喇,因為天國快實現咯!」

3 約翰就係先知以賽亞講嘅嗰個人;佢話:喺曠野有人呼叫:為主準備好佢嘅道路,修直佢要走嘅路徑!

4 約翰着住駱駝毛嘅衫,腰間束住皮帶;食嘅係蝗蟲同野蜜。

5 好大班人從耶路撒冷、猶太全境,同約但河一帶地方嚟到佢面前。

6 佢哋承認自己嘅罪,約翰就喺約但河為佢哋施洗。

7 約翰睇見好多法利賽人同撒吐該人亦嚟求受洗,就對佢哋話:「你哋毒蛇之類呀!上帝嘅審判快要到喇,你哋以為能逃避咩?

8 要用行為證明你哋已經離棄罪惡。

9 唔好自以為亞伯拉罕係你哋嘅祖宗就可以逃避審判!我話俾你哋知,上帝能拎此石頭為亞伯拉罕造出子孫嚟!

10 斧頭已經放喺樹根上,凡唔結好果嘅樹都要斬落嚟,丟喺火裏。

11 我用水幫你哋施洗,表示你哋已經悔改;但係,喺我以後嚟嘅嗰一位將用聖靈同火幫你哋施洗。佢比我偉大得多,就算幫佢拎鞋都唔配。

12 佢手拎住簸箕,要篩淨佢嘅穀物,將麥收入倉庫;至於糠,就用永遠唔熄滅嘅火嚟燒!」

耶穌受洗

13 當時,耶穌從加利利去約但河見約翰,請佢施洗。

14 約翰推辭佢話:「我應當受你施洗,你反轉嚟搵我!」

15 耶穌答佢話:「我哋暫且噉樣做,因為噉樣做就係實行上帝嘅要求。」於是,約翰答應佢。

16 耶穌受洗後,從水上嚟,天為佢開咗;佢見上帝嘅靈好似白鴿降落喺佢身上。

17 跟住,從天上有聲音話:「呢嗰係我嘅愛子,我喜愛佢。」