Library · yue

馬太福音 21

耶穌騎驢入耶路撒冷

1 耶穌同門徒行近耶路撒冷,到橄欖山地區嘅伯法其。

2 耶穌打發兩個門徒先行,吩咐佢哋話:「你哋去前面一條村。會睇見一隻驢同一隻驢仔綁埋一齊;你哋將佢哋解開,拉嚟俾我。

3 若有人對你哋講乜嘢,就話佢知:『主要用佢哋』;佢會立刻俾你哋拉嚟。」

4 呢件事係要應驗先知所講嘅:

5 去話俾錫安城嘅女知:睇呀,你哋嘅君王嚟!佢係溫柔嘅,騎喺驢背上,係騎喺驢仔嘅背上。

6 兩個門徒依照耶穌嘅話去做。

7 佢哋將驢同驢仔拉嚟,將自己嘅衣服搭喺驢背上,然後請耶穌騎上去。.

8 一大班人將自己嘅衣服鋪喺路上,亦有啲人斬落樹枝鋪喺路上。

9 前行後隨嘅人羣大聲呼叫:「頌讚歸於大衛嘅子孫!願上帝賜褔俾嗰位奉主名嚟嘅!讚美上帝!」

10 耶穌入耶路撒冷時,全城都騷動起嚟。有人問:「此人到底係邊個?」

11 羣眾答話:「佢係加利利省拿撒勒嘅先知耶穌。」

耶穌潔淨聖殿

12 耶穌入去聖殿,將所有喺聖殿做買賣嘅人趕出。推倒兌換銀錢嘅人嘅檯同賣白鴿人嘅凳,

13 對佢哋話:「聖經記載,上帝話:『我嘅聖殿必做禱告嘅殿,』你哋將佢變成賊巢!」

14 有盲眼嘅同跛腳嘅嚟聖殿搵耶穌;佢就醫好佢哋。

15 祭司長同經學教師睇見耶穌所行嘅好多奇蹟,又聽聞孩童喺聖殿裏大聲叫:「頌讚歸於大衛嘅子孫!」就好惱怒。

16 佢哋問耶穌:「你聽見佢哋講啲乜嘢呢?」耶穌答話:「我當然聽到。聖經所講:『你使孩童同嬰孩發出完美嘅頌讚』呢句話,唔通你哋冇讀過咩?」

17 於是耶穌離開佢哋,出城去伯大尼,喺嗰處過夜。

咒詛無花果樹

18 第二日一早,喺入城嘅路上,耶穌肚餓。

19 佢睇見路邊有一樖無花果樹,就行埋去,搵唔到乜嘢,只有葉。所以佢指住樖樹話:「你永遠唔會再結果!」無花果樹就立刻枯乾咗。

20 門徒睇見呢個情形,大感驚奇。就問:「呢樖樹點解會立刻枯乾呢?」

21 耶穌答話:「我實在話你哋知,若你哋有信心又冇思疑,我對呢樖無花果樹所做嘅,你哋亦做得到。不但噉,你哋甚至能對呢座山話:『起嚟,扔落海裏!』亦一定會實現。

22 只要有信心,你哋喺禱告中所求嘅一切都必得到。」

質問耶穌嘅權柄

23 耶穌入去聖殿,正在教導人時,祭司長同民間嘅長老嚟見佢,問佢:「你憑乜嘢權做呢啲事?邊個俾你呢啲權呢?」

24 耶穌答佢哋:「我先問你哋一句話,若你哋答我,我就話俾你哋知我憑乜嘢權做呢啲事。

25 約翰施洗嘅權係由邊處嚟嘅?係由上帝抑或係由人嚟嘅呢?」佢哋彼此商議,話:「我哋應該點樣答呢?若我哋話『由上帝處嚟嘅」佢會話:『噉你哋點解唔相信約翰呢?』

26 若我哋話『由人處嚟嘅』,恐怕羣眾會對付我哋,因為佢哋都相信約翰係先知。」

27 於是佢哋答耶穌話:「我哋唔知。」耶穌對佢哋話:「噉樣,我亦唔話俾你哋知我憑乜嘢權做呢啲事。」

兩個仔嘅比喻

28 耶穌又話:「另有一個故事,我想知道你哋嘅睇法。某人有兩個仔,佢對老大話:『仔,你今日去葡萄園做工喇。』

29 佢答話:『我唔去。』但係後來佢改變主意,就去。

30 父親亦對老二講同樣嘅話。老二答話:『父親,我去。』但係並冇去。

31 呢兩個仔究竟邊一個遵照父親嘅意思呢?」佢哋話:「大仔。」耶穌話:「我實在話你哋知,稅吏同娼妓要比你哋先成為上帝國嘅子民。

32 因為施洗約翰嚟,佢指示你哋應該行嘅正路,你哋唔信佢;但係稅吏同娼妓反而信佢。你哋雖然睇見,仍然冇改變心意去信佢。」

壞農夫嘅比喻

33 耶穌又話:「你哋再聽另一個比喻!有一個園主開墾一個葡萄園,周圍用籬圍住,喺園裏挖一個醡酒池,起一座守望臺,然後將葡萄園租俾農夫,自己出外去旅行。

34 到收葡萄嘅季節,佢打發僕人去向農夫收佢應得嘅葡萄。

35 農夫執住僕人,打一個,殺一個,俾石掟一個。

36 園主又打發別的僕人去,人數比先前更多;農夫照樣對付佢哋。

37 最後,園主打發自己嘅仔去。佢想:『佢哋總應該尊敬我嘅仔。』

38 但係農夫睇見個仔時,彼此話:『呢個係園主嘅繼承人,嚟啦,我哋殺死佢,就可以奪取佢嘅產業!』

39 於是佢哋捉住佢,將佢推出園外,殺死佢。

40 噉樣,葡萄園主返喺時,佢要點樣對付嗰啲農夫呢?」

41 佢哋話:「佢一定會除滅呢啲壞人,將葡萄園轉租俾嗰啲按時交租嘅農夫。」

42 耶穌對佢哋話:「聖經嘅話你哋冇讀過咩?匠人丟棄嘅石已經成為最重要嘅基石。呢啲係主嘅作為,係甚奇妙嘅!」

43 耶穌又話:「所以,我話你哋知,上帝要將佢嘅國由你哋處奪去,賜俾嗰啲能結果嘅人。」

44 (有啲古卷加44節;邊個跌喺呢嚿石上,邊個就粉身碎骨,呢嚿石跌喺邊個嘅身上,亦必將邊個壓碎。)

45 祭司長同法利賽人聽聞呢啲比喻「知道耶穌係指佢哋講嘅,

46 就想捉住佢。但係佢哋怕羣眾,因為羣眾承認耶穌係先知。