Library · yue

馬太福音 22

婚宴嘅比喻

1 耶穌又用比喻對佢哋話:

2 天國好比一個國王為自己嘅仔預備婚宴。

3 佢打發僕人去催促佢所邀請嘅客人嚟參加婚宴,但係佢哋唔願意嚟。

4 佢再打發另一批僕人去,吩咐佢哋話俾客人知:『我嘅筵席已經擺好,牛同肥畜都劏咗,一切俱備,請你哋嚟赴宴。』

5 但係,嗰啲被邀請嘅客人總係唔理,各有所忙:一個去自己嘅田,一個去睇自己嘅舖,

6 其餘嘅捉住嗰啲僕人,拳打腳踢,將佢哋殺死。

7 國王大震怒,派兵去除滅嗰啲兇徒,燒毀佢哋嘅城市。

8 然後對僕人話:『我嘅筵席已經擺好,但係先前所邀請嘅人唔配享受。

9 現在你哋去大街上,將遇到嘅人都請嚟赴宴。』

10 於是僕人去街上,將遇到嘅人,無論好壞都請嚟,使席上坐滿客人。

11 國王出嚟會客時,見一人冇着喜宴嘅禮服,

12 就問佢:『朋友,你嚟呢處點解唔穿禮服呢?』嗰個人無言可答。

13 國王就吩咐僕人:『將佢嘅手腳綁起,扔到外邊黑暗嘅地方。喺嗰處,佢必哀哭,咬牙切齒。』」

14 最後,耶穌話:「被邀請嘅人多,但被選上嘅人少!」

納稅嘅問題

15 法利賽人出去,彼此商議點樣從耶穌嘅話搵把柄嚟陷害佢。

16 佢哋打發自己嘅徒弟,同希律黨嘅黨徒去見耶穌,問佢:「老師,我哋知道你係誠實嘅人;唔理人點樣諗,你總係忠實將上帝嘅道教導人,因為你唔睇情面。

17 請話我哋知:向羅馬皇帝該撤納稅係唔係違背我哋嘅律法呢?」

18 耶穌知道佢哋嘅惡意,就話:「假冒為善嘅人呀,點解想陷害我?

19 拎一個納稅用嘅銀幣俾我睇!」佢哋俾一個銀幣過佢。

20 耶穌問佢哋:「呢上面嘅像同名號係邊個嘅呢?」

21 佢哋答話:「係該撒嘅。」於是耶穌對佢哋話:「噉樣,該撒嘅嘢應該歸該撤,上帝嘅歸返上帝。」

22 佢哋聽見呢的話,十分驚奇,就離開佢去。

復活嘅問題

23 同一日,有啲唔相信復生嘅撒吐該人嚟見耶穌,問佢:

24 「老師摩西教導我哋,一個人死咗,冇仔,佢嘅細佬必須娶寡嫂為妻,代大哥傳宗接代。

25 以前,我哋處有兄弟七人,老大結咗婚,死咗,冇仔,留落寡婦俾佢細佬;

26 老二、老三亦係噉樣,一直到老七,情形相同。

27 最後,嗰個女人亦死咗。

28 請問,喺復生時,佢算係邊一個嘅妻呢?佢哋都娶過佢!」

29 耶穌答話:「你哋錯咯!你哋唔明白聖經,亦唔知道上帝嘅權能。

30 喺死人復生時,佢哋同天上嘅天使一樣,唔娶亦唔嫁。

31 關於從死者中復生嘅事,你哋冇讀過上帝講俾你哋知嘅話咩?

32 上帝話:『我係亞伯拉罕嘅上帝,以撤嘅上帝,雅各嘅上帝。』意思係話,上帝係生人嘅上帝,唔係死人嘅上帝。」

33 羣眾聽到呢啲教訓,都覺得驚奇。

最大嘅誡命

34 法利賽人聽見耶穌塞住撒吐該人嘅口,就聚集一齊。

35 其中一個律法教師想用一個問題嚟陷害耶穌。

36 佢問:「老師,喺摩西律法裏,邊一條誡命係最重要嘅?」

37 耶穌話:「『你要以盡心、盡性、盡意愛主—你嘅上帝。』

38 呢條係第一條最重要嘅誡命。第二條亦一樣重要:『你要愛人如己。』

39

40 摩西全部嘅律法同先知嘅教訓都係用呢兩條誡命做根據。」

有關基督嘅問題

41 法利賽人聚集一齊時,耶穌問佢哋:

42 「你哋對基督嘅睇法點樣?佢係邊個嘅子孫呢?」佢哋答話:「佢係大衛嘅子孫。」

43 耶穌話:「噉樣,點解聖靈感動大衛稱呼佢做『主』呢?大衛話:

44 主對我主話:你坐喺我嘅右邊,等我使你嘅仇敵屈服喺你腳下。

45 若大衛稱佢為『主』,基督又點會係大衛嘅子孫呢?」

46 冇人能講回答一句說話。自嗰日起,冇人敢再向佢提出難題。