Library · yue

馬太福音 23

痛責經學教師同法利賽人

1 耶穌對羣眾同佢嘅門徒話:

2 「經學教師同法利賽人企喺摩西嘅地位上解釋律法,

3 你哋要遵從佢哋嘅教訓,但係唔好模仿佢哋嘅行為;因為佢哋只會講,唔會做。

4 佢哋捆紮難孭嘅重擔放喺人哋嘅膊頭上」,但自己唔郁吓一隻手指去減輕佢哋嘅負擔。

5 佢哋無論做乜嘢事都係做俾人睇嘅。佢哋佩戴大嘅經文袋,又加長衣裳嘅邊繸,

6 佢哋喜歡宴會上嘅首座同會堂裏嘅特別座位;

7 佢哋喜歡人哋喺公共場所向佢哋致敬問安,稱呼佢哋『老師』。

8 其實,你哋唔應該被稱為『老師』;因為你哋彼此係兄弟,只有一位係你哋嘅『老師』。

9 你哋唔好稱呼地上嘅任何人為『父親』。因為你哋只有一位喺天上嘅『父親』。

10 你哋亦唔應該被稱為『大師』,因為你哋惟一嘅『大師』就係基督。

11 你哋中邊個係最大嘅,邊個就要做你哋嘅僕人。

12 上帝要將自高嘅人降為卑微,又高舉甘心自卑嘅人。」

痛責偽善嘅人

13 「你哋呢班偽善嘅經學教師同法利賽人有禍咯!你哋當人哋面前將天國嘅門閂埋,自己唔入去,又唔俾想入去嘅人入去!

14 (有啲古卷加14節:你哋呢班偽善嘅經學教師同法利賽人有禍咯!你哋佔寡婦嘅便宜,吞沒佢哋嘅家產,但喺人面前表演長篇嘅禱告,所以你哋必會受更嚴厲嘅懲罰!)

15 你哋偽善嘅經學教師同法利賽人有禍咯!你哋為說服一個人入教,不惜走遍天涯海角,等佢歸依之後,就將佢造得比你哋加倍壞,比你哋更該受地獄嘅刑罰。

16 呢哋呢班盲眼嘅領導有禍咯!你哋話:『凡人指聖殿發誓可以唔算數;若佢指聖殿裏嘅金發誓,就必須遵守。』

17 你哋呢啲盲眼嘅傻人!試問金重要抑或係使金成為聖物嘅聖殿重要呢?

18 你哋又話:『若有人指祭壇發誓,就必須遵守。』

19 你哋呢班盲眼人呀!究竟禮物重要抑或使禮物成聖嘅祭壇重要呢?

20 要知道,人指祭壇發誓就係指祭壇同壇上嘅一切禮物發誓;

21 指聖殿發誓就係指聖殿同住喺殿裏嘅上帝發誓;

22 指天發誓就係指上帝嘅寶座同坐喺上面嘅上帝發誓。

23 你哋呢班偽善嘅經學教師同法利賽人有禍咯!你哋連調味嘅香料,好似薄荷、大茴香、小茴香等都獻上十分之一俾上帝,但係律法上真正重要嘅教訓,例如正義、仁慈、信實,你哋反唔遵守。呢啲重要嘅教訓致係你哋必須實行嘅,至於其他嘅,亦唔好忽略。

24 盲眼嘅領導呀!你哋由飲料中隔出一隻蚋蟲,但將一隻駱駝吞落肚裏!

25 你哋呢班偽善嘅經學教師同法利賽人有禍咯!你哋將杯盤嘅外面洗得乾乾淨淨,但裏面盛滿貪慾同放縱。

26 盲眼嘅法利賽人呀,先洗淨杯嘅裏面,外面就跟住乾淨咯。

27 你哋偽善嘅經學教師同法利賽人有禍咯!你哋好似嗰啲粉飾嘅墳墓,外面好睇,但裏面全係死人嘅骨頭同腐爛嘅嘢。

28 同樣,外表睇起嚟你哋十分公正,但內心裝滿虛偽同邪惡。」

預言佢哋將受嘅刑罰

29 「你哋偽善嘅經學教師同法利賽人有禍咯!你哋為先知修墳,為聖賢立碑,

30 而且話:『若我哋生活喺祖先嘅時代,我哋絕不會似佢哋噉樣殺害先知。』

31 可見你哋已經承認自己係殺害先知嘅人嘅子孫!

32 你哋即管繼續,去完成你哋祖宗嘅暴行喇!

33 毒蛇同毒蛇嘅子孫呀,你哋點能逃脫地獄嘅刑罰呢?

34 你哋要聽!我打發先知、智慧人,同教師到你哋處,有啲被你哋殺害,有啲被你哋釘十字架,有啲俾你哋喺會堂鞭打,從呢個城被趕到另個城。

35 噉樣,一切殺戮無辜嘅懲罰要落喺你哋身上—就係從無辜嘅亞伯,直到你哋喺聖殿同祭壇之間所殺嘅巴拉加嘅仔撒迦利亞嘅血債為止。

36 我實在話你哋知,呢啲懲罰都要歸俾呢一代嘅人。」

為耶路撒冷哀哭

37 「耶路撒冷呀!耶路撒冷呀!你殺先知,又用石掟死上帝打發到你處嘅使者!我幾多次想保護你嘅仔女,好似母雞聚埋雞仔喺翼下一樣。但喺你哋唔願意!

38 睇吓,你哋嘅殿宇將成為人煙絕跡嘅荒場。

39 我話你哋知,你哋從此再唔會見到我,直到你哋話:『願上帝賜福俾嗰位奉主名嚟嘅!』」