馬太福音 24
預言聖殿嘅毀滅1 耶穌由聖殿出嚟,正要離開,門徒嚟到佢面前,將聖殿嘅建築指俾佢睇。
2 耶穌對佢哋話:「你哋唔係睇見呢啲建築咩?我實在話你哋知,呢處嘅每一嚿石將要被拆落,冇一嚿石會留喺另一嚿上面。」
災難同迫害3 耶穌喺橄欖山上坐;門徒私下嚟問佢:「請話俾我哋知,幾時會發生呢啲事呢?你嘅來臨同世界嘅終局有乜預兆呢?」
4 耶穌答話:「你哋要謹慎,唔好被人愚弄。
5 因為有好多人會假冒我嘅名嚟,話:『我係基督』,因而愚弄好多人。
6 你哋聽見打仗嘅風聲同遠方戰爭嘅消息。你哋唔使驚慌,呢啲事必然發生,但唔係話歷史嘅終點已經到。
7 一民族將同另一民族爭戰,一國將攻打另一國;到處會有饑荒同地震。
8 呢啲事嘅發生正如產婦臨產陣痛嘅開始一樣。
9 嗰時,你哋將被捉拿,受酷刑,被殺死。為我嘅緣故,天下嘅人都會憎恨你哋。
10 好多人會放棄佢哋嘅信仰,彼此出賣,彼此仇視。
11 好多偽先知會出現,迷惑人心。
12 因為邪惡氾濫,好多人嘅愛心漸漸冷淡。
13 但係,堅忍到底嘅人必得救。
14 天國嘅福音先要傳遍天下,向全人類做見證,然後歷史嘅終點致會臨到。」
大災難15 「你哋睇見先知但以理所講嘅嗰個『毀滅性嘅可憎之物』企喺神聖地方時(讀者必須領會呢句話嘅含意),
16 住喺猶太地區嘅,應該逃到山上避難;
17 喺屋頂嘅,唔好落去屋裏攞嘢;
18 喺農場嘅,亦唔好返家中攞外衣。
19 嗰啲日子,懷孕同餵奶嘅婦人有禍咯!
20 你哋要懇求上帝唔好俾此事喺冬天或安息日發生。
21 因為嗰時必有大災難係創世以來未曾有過嘅,而且,將來亦唔會再有。
22 若上帝唔縮短嗰啲災難嘅日子,冇人能得救,但係為佢所揀選嘅子民,上帝會縮短嗰啲日子。
23 若有人對你哋話:『睇吓,基督喺呢處!或係,基督喺嗰處!』唔好信佢。24 因為偽基督同偽先知將出現,佢哋將行大神蹟奇事嚟迷惑人;甚至迷惑上帝所揀選嘅子民。
24
25 記住!我已經預先話你哋知。
26 若有人話你哋知:『睇吓,基督喺曠野!』你哋唔好出去;或話:『睇吓,佢喺屋裏!』你哋亦唔好信。
27 閃電從東邊發生,直照到西邊,人子降臨,亦係噉樣。
28 屍首喺邊處,麻鷹亦會聚喺嗰處。」
人子嘅來臨29 「嗰啲災難嘅日子一過去,日頭就變黑,月亮唔再發光,眾星從天墜落,太空嘅系統亦搖動。
30 嗰時,人子來臨嘅記號要喺天上出現。地上萬族萬民都要哀哭;睇見人子充滿能力同大榮耀駕住天雲降臨。
31 號角嘅聲音大響,佢將打發天使從四方,從天呢邊,到天嗰邊,召集佢所揀選嘅子民。」
無花果樹嘅教訓32 「你哋要從無花果樹學教訓。當樹枝呈現嫩綠嘅顏色,長出新葉時,你哋知道夏天快到咯。
33 同樣,你哋睇見呢一切現象就知時候快到咯,就喺門口咯。
34 我實在話你哋知:呢一代嘅人重未全去世以前,呢一切事都要發生。
35 天地要消失,但我嘅話永唔消失。」
嗰日嗰時冇人知36 「至於嗰個要臨到嘅日子同時間,冇人知;天上嘅天使唔知,子亦唔知,只有父知。
37 人子嘅來臨好似挪亞時代所發生嘅事一樣。
38 洪水未嚟以前,人照常飲食嫁娶,直到挪亞入方舟嗰日;
39 佢哋糊裏糊塗,洪水嚟,滅佢哋。人子嘅來臨亦係噉。
40 嗰時,兩人喺田裏工作,一個被接去,另一個留喺處;
41 兩個女子喺處推磨,一個被接去,另一個留低。
42 所以,要警醒,因為你哋唔知主喺邊一日來臨。
43 要記住呢一點;家主人若係知夜晚乜嘢時候有賊嚟?佢必定會警醒,唔俾佢破門而入。
44 所以,你哋也亦應該隨時準備好,因為人子喺你哋料想唔到嘅時間忽然嚟到。」
可靠同唔可靠嘅僕人45 「邊個係可靠及機智嘅僕人受主人指派嚟管理其他僕人,按時分配糧食俾佢哋嘅呢?
46 主人返嚟時,睇見個僕人咁忠於職守,佢係真有福咯!
47 我實在話你哋知,主人要派佢管理所有嘅產業。
48 但係,若佢係一個壞僕人,心裏話『或者主人唔會咁早返嚟』,
49 於是動手毆打其他同伴,同酒徒飲食玩樂。
50 喺佢料想唔到嘅日子,唔知嘅時間,主人就返嚟。
51 主人必重重責打佢,使佢同假冒為善嘅人一齊受罰;喺嗰處,佢必哀哭,咬牙切齒。」