Library · yue

馬太福音 25

十個童女嘅比喻

1 「嗰日,天國好比以下嘅故事:有十個童女手裏拎住油燈,出去迎接新郎。

2 其中五個係愚蠢嘅,五個係聰明嘅。

3 愚蠢嘅帶備燈,但冇預備足夠嘅油;

4 聰明嘅帶備燈,另外又帶油。

5 新郎遲嚟,佢哋都眼瞓,瞓着咗。

6 到半夜有人呼叫話:『新郎到啦,你哋出去迎接佢囉!』

7 十個童女就起身,整好佢哋嘅燈。

8 嗰時,愚蠢嘅對聰明嘅話:『請分一啲油俾我哋,因為我哋嘅燈就嚟熄咯。』

9 聰明嘅答話:『對唔住,我哋嘅油實在唔夠分俾你哋,你哋自己去舖頭買喇。』

10 愚蠢嘅童女去買油時,新郎就到。五個有準備嘅童女同新郎一齊入去,同赴婚宴,門就關上。

11 其他嘅童女隨後亦到;佢哋叫話:『先生,先生,請開門俾我哋!』

12 新郎答話:『我實在話你哋知,我唔識你哋。』

13 耶穌話:「所以,你哋要警醒,因為你哋唔知嗰個日子、嗰個時間會喺幾時嚟到。」

三個僕人嘅比喻

14 「天國又好比以下嘅故事;有一人要出外旅行,佢叫僕人嚟,將產業交俾佢哋。

15 佢按照佢哋各人嘅才幹,一個俾五千,一個俾兩千,一個俾一千,然後去。

16 嗰個領五千嘅,立刻出去做生意,賺得五千。

17 同樣,嗰個領兩千嘅,亦賺得兩千。

18 但係嗰個領一千嘅,出去,喺地下挖一個窿,將主人嘅錢埋起。

19 過好耐,僕人嘅主人返嚟,同佢哋結帳。

20 領五千嘅入嚟,帶嚟另外嘅五千,話:『主人,你俾我五千,你睇,我又賺得五千。』

21 主人話:『好,你個又好又可靠嘅僕人!你瞧小數目上可靠,我要委託你經管大數目。入嚟同你嘅主人一齊享受快樂喇!』

22 嗰個領兩千嘅入嚟,話:『主人,你俾我兩千,你睇,我又賺得兩千。』

23 主人話:『好,你個又好又可靠嘅僕人,你喺小數目上可靠,我要委託你經管大數目。入嚟同你嘅主人一齊享受快樂喇!』

24 嗰個領一千嘅僕人亦入嚟,話:『主人,我知你係個嚴厲嘅人;你喺冇栽種嘅地方亦要收割,冇撒種嘅地方亦要收聚。

25 我驚起嚟,所以將你嘅錢埋喺地下。請睇吓,你嘅錢喺呢處。』

26 佢嘅主人話:『你個又壤又懶嘅僕人!既然你知我喺冇栽種嘅地方亦要收割,冇撒種嘅地方亦要收聚,

27 就應該將我嘅錢存入銀行,等我返嚟時,可以連本帶利一齊收返。

28 你哋將佢嘅錢拎過嚟,俾嗰個有一萬嘅。

29 因為嗰啲已經有嘅,要俾更多佢,等佢豐富有餘;而嗰啲冇嘅,連佢所有嘅都要奪去。

30 至於呢個無用嘅僕人,將佢趕出去外面黑暗嘅地方;喺嗰處,佢必哀哭,咬牙切齒。』」

最後嘅審判

31 「當人子做王、天使同佢一齊嚟到時,佢要坐喺榮耀嘅寶座上;

32 地上萬民都要聚集喺佢面前。佢將佢哋分為兩羣,好似牧羊人從山羊中將綿羊分別出嚟一樣。

33 佢將綿羊放喺右邊,山羊放喺左邊。

34 然後,王對喺佢右邊嘅人話:『蒙我父賜福嘅人呀,你哋嚟!承受從創世以來為你哋預備嘅國度。

35 因為我肚餓,你哋俾我食,口渴你哋俾我飲;我流落異鄉,你哋接待我到你哋家中;

36 我赤身,你哋俾我着;我有病,你哋照顧我;我坐監,你哋嚟探望我。』

37 嗰時,義人要答話:『主呀,我哋幾時見你肚餓,俾你食?口渴,俾你飲?

38 幾時見你流落異鄉而接待你到我哋家中?見你赤身俾你着?

39 我哋幾時見你有病或坐監去探望你呢?』

40 王答話:『我實在話你哋知,無論乜嘢時候,你哋喺我兄弟中一個最小嘅人身上做,就係為我做!』

41 然後,王對喺佢左邊嘅人話:『走開!受上帝咒詛嘅人,你哋離開我!入去為魔鬼同佢爪牙所預備永唔熄滅嘅火裏面!

42 因為我肚餓,你哋冇俾我食,口渴,你哋冇俾我飲;

43 我流落異鄉,你哋冇接待我到你哋家中;赤身,你哋冇俾我着;我有病或坐監,你哋冇照顧我。』

44 嗰時,佢哋會話:『主呀,我哋幾時見你飢餓 ,或口渴,或流落異鄉,或赤身,或有病,或坐監,冇去幫助你呢?』

45 王答佢哋話:『我實在話你哋知,無論幾時,你哋拒絕幫助一個最小嘅人,就係拒絕幫助我。』

46 噉樣嘅人要受永遠嘅刑罰。至於嗰啲義人,佢哋必會得到永生。」