馬太福音 26
除滅耶穌嘅陰謀1 耶穌講完呢啲一切,就對門徒話:「你哋知道,
2 再過兩日就係逾越節,人子將被出賣,被釘喺十字架上。」
3 嗰時,祭司長同民間嘅長老喺大祭司該亞法嘅府邸聚會,
4 計劃要秘密捉拿耶穌,將佢處死。
5 但喺佢哋話:「我哋唔好喺節期間進行呢件事,免致激起民眾嘅暴動。」
在伯大尼受膏6 耶穌喺伯大尼患痲瘋病嘅西門家中;
7 有個女人帶一個玉瓶嚟,盛滿珍貴嘅香油。耶穌在食飯時,個女人將香油倒喺耶穌頭上。
8 門徒睇見,好唔高興,話:「點解咁浪費?
9 呢啲香油可以賣唔少錢嚟救濟窮人!」
10 耶穌知道,就對佢哋話:「何必難為呢個女人呢?佢對我所做嘅係一件美好嘅事。
11 因為常時都會有窮人同你哋喺埋一齊,但係我唔能常同你哋喺埋一齊。
12 佢將呢啲香油倒喺我身上係為我嘅安葬做準備。
13 我實在話你哋知,普天之下,無論此福音傳到邊處,都要講起佢所做嘅事,嚟記念佢。」
猶大出賣耶穌14 耶穌嘅十二門徒中,有一個加略人猶大;佢去見祭司長,
15 話:「若我將耶穌交俾你哋,你哋願意俾乜嘢我呢?」佢哋拎三十兩銀俾佢。
16 由嗰時起,猶大就搵機會出賣耶穌。
耶穌同門徒同食逾越節晚餐17 除酵節嘅第一日,門徒嚟問耶穌:「你要我哋喺邊處為你預備逾越節嘅晚餐呢?」
18 耶穌答話:「你哋入城去見某人,對佢話:『老師話:我嘅時候快到咯;我同門徒要喺你家中守逾越節。』」
19 門徒依照耶穌嘅吩咐去安排逾越節嘅晚餐。
20 傍晚,耶穌同十二門徒坐席。
21 食飯時,耶穌話:「我實在話你哋知,你哋中有一個將出賣我。」
22 門徙非常憂愁,逐個問佢:「主呀,係我咩?」
23 耶穌答話:「同我一齊擠餅落盤嘅嗰個人就係出賣我嘅。
24 正如聖經講,人子必要去世,但係出賣人子嘅人有禍咯!佢冇出世重好!」
25 出賣耶穌嘅猶大亦開口問:「老師,係我咩?」耶穌話:「你講對咯。」
主嘅晚餐26 佢哋食飯時,耶穌拎起餅,先獻上感謝嘅禱告,然後擘開,分俾門徒,話:「你哋拎嚟食;呢啲係我嘅身體。」
27 跟住,佢拎起杯,向上帝感謝後,遞俾佢哋,話:「你哋飲喇;
28 呢啲係我立約嘅血,為多人流出,使罪得赦免。
29 我話你哋知,從今以後,我唔再飲此葡萄汁,直到我同你哋喺我父嘅國裏飲新嘅嗰日。」
30 佢哋唱首詩,就出去,到橄欖山。
預言彼得唔認佢31 後來,耶穌對門徒話:「今晚,你哋都要為我嘅緣故離棄我;因為聖經話:『上帝要擊殺牧人,羊羣就分散。』
32 但係我復生之後,要比你哋先去加利利。」
33 彼得對耶穌話:「即使其他人都離棄你,我絕唔離棄你!」
34 耶穌對彼得話:「我實在話你知,今晚,雞啼以前,你會三次唔認我。」
35 彼得答話:「即使我同你一齊死,我亦唔會唔認你!」 其他門徒亦噉樣講。
在客西馬尼園嘅禱告36 耶穌同門徒嚟到一處,名叫客西馬尼;對佢哋話:「你哋喺呢處坐, 我去個邊禱告。」
37 於是佢帶住彼得同西庇太嘅兩個仔一齊去。佢開始憂愁難過,
38 對佢哋話:「我嘅心非常憂傷,幾乎要死。你哋喺呢處等候,同我一齊警醒喇!」
39 佢稍向前行,俯伏地上,禱告話:「我父呀,若係可以,求你唔好使我飲此苦杯!但係,唔係照我嘅意思,只要照你嘅旨意。」
40 佢返到三個門徒處,發現佢哋都訓着咗,就對彼得話:「你哋唔能同我一齊警醒一小時咩?
41 要警醒禱告,免致陷入誘惑。你哋心靈係願意,但肉體軟弱。」
42 第二次耶穌再去禱告話:「我父呀,若係此苦杯唔可以離開我,必要我飲,願你嘅旨意成全!」
43 佢再返到門徒處,見佢哋又瞓着;佢哋連眼都睜唔開。
44 耶穌再離開佢哋,第三次去禱告,所講嘅同先前一樣。
45 然後佢又返到門徒處,話:「你哋重係瞓覺;重係休息咩?睇吓,人子被出賣喺罪人手中嘅時候到咯。
46 起身,我哋去喇!睇吓,出賣我嘅人嚟咯!」
耶穌被捕47 耶穌重講緊時,十二門徒之一嘅猶大嚟到。有一大班人帶住刀棍同佢一齊嚟;佢哋係祭司長同民間長老派嚟嘅。
48 出賣耶穌嘅人先俾一個暗號佢哋,話:「我去吻邊個,邊個就係你哋所要嘅人,你哋就捉住佢。」
49 猶大一到,立刻走到耶穌面前,話:「老師,你好,」然後同佢接吻。
50 耶穌話:「朋友,你想做嘅,快做喇!」於是,嗰哋人上前,捉住耶穌,將佢綁起。
51 同耶穌喺一齊嘅人中,有一個拔刀,向大祭司嘅僕人斬,將佢一隻耳削甩。
52 耶穌對佢話:「收起把刀;因為凡動刀嘅,一定喺刀下喪命。
53 唔通你唔知我可以向我父求救,佢就會立刻調十二營多嘅天使嚟咩?
54 若我噉做,聖經所講、事情必須噉發生嘅嗰啲話又點能實現呢?」
55 跟住,耶穌向嗰一班人話:「你哋帶刀劍共棍出嚟捉我,將我當做強盜咩?我日日坐喺聖殿裏教導人,你哋並冇落手。
56 不過,呢一切事情嘅發生都係要實現先知喺聖經所講嘅話。」此時,所有嘅門徒都離棄佢逃去。
在議會受審57 嗰啲捉耶穌嘅人將耶穌帶去大祭司該亞法嘅住家。喺嗰處,經學教師同長老正喺處聚會。
58 彼得遠遠跟住耶穌,直到大祭司嘅院。彼得行入裏頭,同警衛一齊坐,想睇呢件事到底點樣。
59 祭司長同全議會設法搵假證據控告耶穌,要置佢於死地:
60 雖然有好多人誣告佢,但係拎唔出證據。最後,有兩個人上前話:「呢個人講過:『我能拆毀上帝嘅聖殿,三日內又將佢重建起嚟。』」
61
62 大祭司起身,對耶穌話:「呢啲人對你嘅控告,你冇乜嘢答辯咩?」
63 耶穌唔出聲。大祭司再一次對佢話:「我指永生上帝嘅名叫你發誓話俾我哋知,你係唔係基督、上帝之子?」
64 耶穌答話:「你講得啱。但係我話你哋知,此後,你哋要睇見人子坐喺全能者嘅右邊,駕着天雲降臨!」
65 大祭司一聽見呢啲話,就撕裂自己嘅衫,話:「佢侮辱上帝! 我哋再唔需要證人咯。你哋都聽見佢侮辱上帝;
66 你哋認為點呢?」佢哋答話:「佢應該死!」
67 佢哋吐口水喺佢面上,又用拳頭打佢。嗰啲用手摑佢嘅人,
68 話:「基督呀!你係先知。你話喇,打你嘅係邊個?」
彼得唔認耶穌69 彼得喺外院坐;有大祭司嘅女工人走過嚟,話:「你同嗰個加利利人耶穌係一齊嘅。」
70 彼得喺大眾面前否認。佢話:「我唔知你喺處講啲乜嘢,」
71 然後走出去,到門口。又有一個女工人睇見佢,向企喺嗰處嘅人話:「呢個人同拿撒勒嘅耶穌做同伴嘅。」
72 彼得再次否認,發誓話:「我根本唔認識嗰個人!」
73 過冇耐,隔籬企喺處嘅人前嚟,對彼得話:「你同佢哋確係一齊嘅;你嘅口音露出馬腳。」
74 彼得再一次咒詛話:「我唔認識嗰個人。若我講嘅唔係真話,上帝會懲罰我!」就喺呢個時候,雞就啼。
75 彼得想起耶穌嘅話:「雞啼以前,你會三次唔認我。」就走出去,忍唔住痛哭起嚟。