馬太福音 4
耶穌受試探1 當時,耶穌被聖靈帶到曠野,受魔鬼試探。
2 禁食四十晝夜後,耶穌覺得肚餓。
3 魔鬼上前對佢話:「你若係上帝之子,就命令呢啲石變成食物喇!」
4 耶穌答話:「聖經有寫落話:『人嘅生存唔單止係靠食物,更係靠上帝講嘅每一句話。』」
5 魔鬼又帶耶穌到聖城,使佢企喺聖殿頂最高嘅地方,
6 對佢話:「你若係上帝之子,就跳落去;因為聖經話:主將為你吩咐佢嘅天使,用佢哋嘅手托住你,使你嘅腳不至於踢親石頭。」
7 耶穌答話:「喺聖經亦有寫落話:『唔好試探主—你嘅上帝。』
8 最後,魔鬼帶耶穌上到好高嘅山,將世上萬國同佢嘅榮華俾佢睇。
9 魔鬼話:「你若跪下拜我,我就將呢一切賜俾你。」
10 耶穌答話:「撒但,走開!聖經有寫落話:『要拜主—你嘅上帝,單要事奉佢。』」
11 於是,魔鬼離開耶穌,天使就嚟伺候佢。
耶穌開始喺加利利傳道12 耶穌聽聞約翰坐監,就去加利利。
13 佢冇喺拿撒勒住,但去住喺迦百農。嗰個城喺西布倫同納大利境內,靠近加利利湖。
14 噉樣就應驗先知以賽亞嘅話:
15 西布倫同納大利,沿海嘅道路,喺約但河對岸,外邦人嘅加利利!
16 住喺黑暗中嘅人會睇見大光;住喺死蔭之地嘅人有光照亮佢哋。
17 由嗰時開始,耶穌宣講佢嘅信息話:「離棄罪惡喇!因為天國快實現咯。」
耶穌呼召四漁夫18 耶穌沿住加利利湖邊行,睇見兩個攞魚嘅兄弟,西門(又叫彼得)同佢嘅細佬安得烈,正喺湖面撒網攞魚。
19 耶穌對佢哋話:「來跟從我!我要使你哋成為得人嘅漁夫。」
20 佢哋即刻丟低魚網,跟從耶穌。
21 耶穌再向前行,睇見另外兩兄弟—即係西庇太嘅仔雅各同約翰;佢哋同父親一齊喺船上整理魚網。耶穌呼召佢哋,
22 佢哋即刻捨棄船,辭別父親,跟從耶穌。
耶穌喺加利利工作23 耶穌走勻全加利利省,喺各處會堂教導人,宣傳天國嘅福音,醫好民間各樣嘅疾病。
24 佢嘅名聲傳遍敘利亞,嗰處嘅居民將患各種病症、經歷各樣痛苦嘅人:例如被鬼迷嘅、癲癇嘅、癱瘓嘅,都帶到佢處,佢就醫好佢哋。
25 好多人從加利利、低加波利、耶路撒冷、猶太,同約但河對岸一帶嚟跟隨佢。