Library · yue

馬太福音 5

山上寶訓

1 耶穌睇見一大班人,就上山,坐低;佢嘅門徒圍住佢。

2 佢開始教導佢哋話:

3 「承認自己靈性貧乏嘅人有福咯;因為佢哋係天國嘅子民呀!

4 為罪惡悲傷嘅人有福咯;因為上帝將安慰佢哋呀!

5 謙和嘅人有福咯;因為佢哋將承受上帝所應許嘅產業呀!

6 渴望實行上帝旨意嘅人有福咯;因為上帝將充分滿足佢哋呀!

7 用仁慈待人嘅人有福咯;因為上帝亦將用仁慈待佢哋呀!

8 心地純潔嘅人有福咯;因為佢哋將睇見上帝呀!

9 促進和平嘅人有褔咯;因為佢哋將得稱為上帝之子呀!

10 為實行上帝嘅旨意而受迫害嘅人有福咯;因為佢哋係天國嘅子民呀!

11 人若因你哋跟從我而侮辱、迫害你哋,講各樣壞話毀謗你哋,你哋就有福咯!

12 應當歡喜快樂,因為喺天上有豐富嘅獎賞為你哋保存呀;以前嘅先知亦同樣受過人嘅迫害。」

鹽同光

13 「你哋係世上嘅鹽。鹽若失去鹹昧,就唔能夠使佢再鹹。佢已成為廢物,只好扔出去,任人踹踏。

14 你哋係世上嘅光。一座建造喺山上嘅城係不能被遮蓋住嘅。

15 人點燈唔放喺斗下,必放喺燈臺上,照住全屋嘅人。

16 同樣,你哋嘅光亦應該照喺人前,俾人見你哋嘅好行為,就稱讚你哋喺天上嘅父親。」

論律法

17 「唔好以為我嚟嘅目的係要廢除摩西嘅律法同先知嘅教訓。我唔係嚟廢除,而係嚟成全佢哋嘅真義。

18 我實在話你哋知,只要天地重存在,律法嘅一點一畫都不能廢去,直到萬事嘅終結。

19 所以,邊個違犯誡命中最細嘅一條,而且教人噉做嘅,佢喺天國裏將成為最細嘅。相反,邊個遵守律法,而且教人同樣遵守嘅,佢喺天國裏將成為最大嘅。

20 我話你哋知,你哋一定要比經學教師同法利賽人更加忠誠實行上帝嘅旨意致能入天國。」

論發怒

21 「你哋聽過,古人嘅教訓話:『唔好殺人;殺人嘅應該受律法嘅制裁。』

22 但係我話你哋知,向兄弟動怒嘅(有啲古卷加:無緣無故),亦要受裁判;鬧兄弟做『廢物』嘅,要上法庭;鬧兄弟做『蠢豬』嘅,亦逃唔過地獄嘅火刑。

23 所以,你喺祭壇前獻禮物俾上帝時,若係想起有兄弟對你不滿,

24 你就應該將禮物留喺祭壇前,先去同佢和好,然後再返嚟將禮物獻俾上帝。

25 「若有人控告你,將你拉上法庭,你應該趁住重未到法庭之前同佢和解。若唔係,等到入咗法庭,佢就將你交俾法官,法官將你交俾法庭嘅警察,收你入監。

26 我實在話你知,噉你就要坐監,等到你還清罰款嘅最後一分錢。」

論姦淫

27 「你哋聽見古時有噉嘅教訓話:『唔好姦淫。』

28 但係我話你哋知,睇見婦女而生邪念嘅,喺心裏已經同佢犯咗姦淫咯。

29 若你嘅右眼使你犯罪,就挖佢出嚟,扔咗去!損失身體嘅一部比全身體陷入地獄好得多。

30 若你嘅右手使你犯罪,就斬佢落嚟,扔咗去!損失肢體嘅一部比全身體落地獄好得多。」

論休妻

31 「又有教訓話:『凡想休妻嘅,就要寫休書俾佢。』

32 但係我話你哋知,除非妻唔貞潔,丈夫不能離棄佢。因為,若係妻再嫁,佢等於使妻犯姦淫;娶佢嘅男人亦算犯姦淫。」

論發誓

33 「你哋又聽見古人嘅教訓話:『唔好違背誓言;喺主前所發嘅誓必須遵守。』

34 但我話你哋知,你哋根本唔可以發誓。唔好指天發誓,因為天係上帝嘅寶座;

35 唔好指地發誓,因為地係上帝嘅腳凳;亦唔好指耶路撒冷發誓,因為佢係大君王嘅城;

36 甚至唔好指自己嘅頭發誓,因為你不能使自己嘅一條頭髮變黑或變白。

37 你哋講話,係,就話係,唔係,就話唔係;多講就係出於邪惡嘅。」

論報復

38 「你哋聽過有噉嘅教訓|話:『以眼還眼,以牙還牙。』

39 但我話你哋知,唔好向欺負你哋嘅人報復。

40 有人打你嘅右邊,連左面亦俾埋佢打!有人拉你上法庭,要你嘅內衣,連外衣亦俾佢!

41 若有人強迫你幫佢孭行李行一里路,你就同佢行兩里!

42 求你嘅,就俾佢;向你借嘅,就借俾佢。」

論愛仇敵

43 「你哋又聽見噉嘅教訓話:『愛你嘅朋友,恨你嘅仇敵』

44 但係我話你哋知,要愛你哋嘅仇敵,而且為迫害你嘅人禱告。

45 噉樣,你哋致可以做天父嘅仔女。因為,天父使日頭照好人,亦同樣照壞人;降雨俾行善嘅,亦俾作惡嘅。

46 若你哋淨係愛嗰啲愛你哋嘅人,上帝又何必獎賞你哋呢?就算連稅吏亦會噉做嘅。

47 若你哋淨係向朋友打招呼,噉又有乜了不起呢?就算連異教徒都會噉做。

48 你哋要完全,正如你哋嘅天父係完全一樣。」