Library · yue

馬太福音 7

唔好論斷別人

1 「唔好論斷人,上帝就唔審斷你哋。

2 因為上帝用你哋論斷人嘅標準嚟審斷你哋;亦用你哋量度人的尺度嚟量度你哋。

3 你點解只睇見你兄弟眼中嘅刺,但唔理自己眼中嘅樑木呢?

4 你眼裏有樑木,點能對你嘅兄弟話:『等我嚟除你眼中嘅刺』呢?

5 偽善嘅人呀,先除去你眼中嘅樑木,致能睇得清楚點樣將你兄弟眼中嘅刺挑出嚟。

6 唔好將神聖嘅嘢丟俾狗,佢哋會轉過頭嚟咬你哋;唔好將珍珠掟俾豬,佢哋會將珍珠踐踏喺腳下。」

祈求,尋找,敲門

7 「你哋祈求,就得到;尋找,就搵到,敲門,就開門俾你哋。

8 因為凡祈求嘅,就得到;尋找嘅,就搵到;敲門嘅,就為佢開門。

9 你哋中有邊個,有仔要麵包,就拎石頭俾佢?

10 要魚,就拎蛇俾佢?

11 你哋雖然係惡,尚知俾好嘢過仔女,你哋喺天上嘅父豈唔更將好嘢賜俾祈求佢嘅人咩?

12 你哋想人點樣待你哋,就要點樣待人;呢啲就係摩西律法同先知教訓嘅真義。

窄門

13 「你哋要從窄門入去;因為通向滅亡嘅係闊嘅,路係好行嘅,入去嘅人好多。

14 通向生命嘅門係窄,路係難行,搵到嘅人好少。」

樹同果子

15 「你哋要提防偽先知。佢哋嚟到你哋面前,外表睇嚟好似綿羊,但裏面係兇惡嘅豺狼。

16 你哋能從佢哋嘅行為認出佢哋。荊棘唔可能結出葡萄,蒺藜亦唔可能結出無花果。

17 好樹結好果;壞樹結壤果。

18 好樹唔可能結壞果;壞樹亦唔可能結好果。

19 唔結果嘅樹都要斬落嚟,扔喺火裏。

20 所以,由佢哋嘅行為,你哋就能認出偽先知。」

我唔認識你哋

21 「稱呼我『主呀,主呀』嘅人並未必能入天國;只有實行我天父旨意嘅致入得。

22 末日嚟到時,好多人會對我話:『主呀,主呀,我哋曾奉你嘅名傳上帝嘅信息,亦曾奉你嘅名趕好多鬼,行好多奇蹟!』

23 嗰時,我就對佢哋話:『我從來唔認識你哋;你哋作惡嘅人,走開喇!』」

兩種起屋嘅人

24 「所以,所有聽聞我呢啲話去實行嘅人,係好似一個聰明人將間屋起喺磐石上;

25 雖受風吹,雨淋,水沖,間屋亦唔會冧,因為佢嘅基礎立喺磐石上。

26 但係,聽聞我呢啲話而唔去實行嘅,係好似一個愚蠢嘅人,

27 將間屋起喺沙土上,一遇到風吹,雨淋,水沖,間屋就冧落嚟,而且冧得好交關!」

耶穌嘅權威

28 耶穌講完呢啲話,羣眾對佢嘅教訓都感到十分驚奇;

29 因為耶穌同佢哋嘅經學教師唔同,佢嘅教訓帶有權威。