Library · yue

馬可福音 10

有關休妻嘅教訓

1 耶穌離開嗰處嚟到猶太地區,渡過約但河。羣眾又聚集到佢處,佢就照常教導佢哋。

2 法利賽人嚟見耶穌,想陷害佢,問佢:「請話我哋知,我哋嘅律法准唔准丈夫休妻呢?」

3 耶穌反問:「摩晒嘅命令係點樣講呢?」

4 佢哋答話:「摩西准丈夫寫一張休書俾妻,就可以休咗佢。」

5 耶穌對佢哋話:「摩西寫呢條誡命俾你哋係因為你哋嘅心腸太硬。

6 但係太初,喺創世時,上帝造人,有男有女;

7 所以人要離開父母,同妻結合,

8 兩人成為一體。既然噉樣,夫妻唔再係兩個人,而係一體。

9 所以,上帝所配合嘅,人唔可以分開。」

10 佢哋返入屋,門徒又問起呢件事。

11 耶穌話佢哋知:「任何人休妻,再去同其他嘅女人結婚,就係犯姦淫,辜負佢嘅妻;

12 妻若離棄丈夫,嫁別人,亦係犯姦淫。」

耶穌祝福孩提

13 有啲人帶孩提嚟見耶穌,請耶穌摸佢哋;門徒就責備嗰啲人。

14 耶穌睇見就惱怒,對門徒話:「由得孩提嚟我處,唔好阻止佢哋,因為上帝國嘅子民正係好似佢哋噉樣嘅人。

15 我實在話你哋知,凡唔係好似孩提一樣接受上帝國嘅人,絕不能成為佢嘅子民。」

16 於是佢抱起孩提,逐個為佢哋按手,為佢哋祝福。

財主嘅難題

17 耶穌正要出去行路時,有一個人走嚟,跪喺佢面前,問佢:「良善嘅老師,我要做乜嘢致能夠得到永生呢?」

18 耶穌對佢話:「你點解稱我為良善嘅呢?除上帝之外,再冇良善嘅。

19 你一定識得呢啲誡命:『不可殺人;不可姦淫;不可偷竊;不可作假證;不可欺詐;要孝敬父母。』」

20 個人答話:「老師,呢一切誡命我自細都遵守。」

21 耶穌定眼睇佢,心裏愛佢,就話:「你重缺少一樣,去賣你所有嘅產業,將錢賙濟窮人,你就會有財富積存喺天;然後嚟跟從我。」

22 個人一聽見呢啲話,面色即時變咗,垂頭喪氣走去,因為佢好富有。

23 耶穌周圍睇吓,對佢嘅門徒話:「有錢人成為上帝國嘅子民係好難呀!」

24 門徒對佢呢啲話大感驚奇;但係耶穌又話:「孩子呀!信賴錢財嘅人要成為上帝國嘅子民係難呀!

25 有錢人要成為上帝國嘅子民,比駱駝穿過針眼更加困難!」

26 嗰時,門徒份外驚奇,彼此對問:「噉講,邊個致能得救呢?」

27 耶穌定眼睇佢哋,話:「在人係不能;但在上帝就唔係;因為在上帝萬事都能。」

28 彼得就對佢話:「你睇,我哋已經捨棄一切嚟跟從你。」

29 耶穌對佢哋話:「我實在話你哋知,凡為我同福音捨棄房屋、兄弟、姊妹、父母、仔女,或田地嘅,

30 必定喺今世收穫更多。佢會得到百倍嘅房屋、兄弟、姊妹、父母、仔女,田地,而且要遭受迫害;而喺來世,佢將得到永生。

31 但係,好多做先嘅將要做後;做後嘅將要做先。」

耶穌第三次預言自己嘅死

32 佢哋喺去耶路撒冷嘅路上,耶穌喺前頭行。門徒就希奇;其他跟從嘅人亦驚慌。耶穌又將十二門徒帶埋一邊,對佢哋講將要發生喺佢身上嘅事。

33 佢話:「我哋上去耶路撒冷。人子將會被出賣俾祭司長同經學教師;佢哋要判佢死刑,然後將佢交俾異邦人。

34 佢哋就戲弄佢,向佢吐口水,鞭打,而且殺佢;三日後,佢就復生。」

雅各同約翰嘅要求

35 西庇太嘅仔雅各同約翰嚟見耶穌,話:「老師,我哋有一個請求,希望你能答應。」

36 耶穌問:「要我為你哋做乜嘢?」

37 佢哋答話:「當你坐喺榮耀嘅寶座上時,俾我哋同你坐埋一齊,一個喺你右邊,一個喺你左邊。」

38 耶穌對佢哋話:「你哋唔知道所求嘅係乜嘢。我要飲嘅苦杯,你哋能飲咩?我要受嘅洗禮,你哋能受咩?」

39 佢哋答話:「我哋能!」耶穌話:「我要飲嘅杯,你哋固然要飲,我要受嘅洗禮,你哋固然要受,

40 但係邊個坐喺我嘅左右,就唔係我能決定嘅。呢啲坐位,上帝為邊個預備,就賜俾邊個。」

41 其他十個門徒聽見,就對雅各同約翰好不滿。

42 所以,耶穌叫佢哋到佢處,對佢哋話:「你哋知道,世上嘅上,有被認為係執政管轄佢哋嘅,有領導操權管束佢哋嘅;

43 但係,你哋就唔係噉。你哋中邊個要做大嘅,邊個要做你哋嘅僕人;」

44 邊個要做領袖嘅,邊個就要做大眾嘅奴僕。

45 因為人子唔係嚟受人侍候,係嚟侍候人,而且為救贖大眾而獻出自己嘅生命。」

醫好盲人巴底買

46 佢哋嚟到耶利哥城。當耶穌同門徒及一大班人離開耶利哥時,有一個盲眼乞兒,即係底買嘅仔,巴底買,坐喺路邊。

47 佢一聽見係拿撒勒嘅耶穌,就叫話:「耶穌,大衛嘅子孫可憐我喇!」

48 好多人責備佢,唔准佢出聲。但佢越發大聲叫:「大衛嘅子孫,可憐我喇!

49 耶穌停落嚟,話:「叫佢過嚟。」佢哋就對盲人話:「你放心,起身,耶穌叫你呀!」

50 盲人馬上扔咗外衣,跳起身,到耶穌面前。

51 耶穌問佢:「你想我為你做乜嘢?」盲人答話:「老師,我想睇得見!」

52 耶穌話:「去喇,你嘅信心醫好你咯。」盲人即刻睇得見,就跟從耶穌走。