Library · yue

馬可福音 9

1 耶穌又對佢哋話:「我實在話你哋知,企係呢處嘅人,有啲會喺佢死之前睇見上帝嘅國有大能力嚟到。」

改變形像

2 六日後,耶穌帶住彼得、雅各,同約翰,靜靜上去高山。喺佢哋面前,耶穌變咗形像,

3 衣服變成潔白光亮;世上冇人能將布漂得咁潔白。

4 三個門徒忽然睇見以利亞同摩西共耶穌講話。

5 彼得對耶穌話:「老師,我哋喺呢處真係好!等我哋搭三座帳幕,一座俾你,一座俾摩西,一座俾以利亞。」

6 彼得同其他嘅人都好驚,唔知道應該講乜嘢好。

7 嗰時有雲出現,遮住佢哋。忽然,喺雲裏有聲傳出,話:「呢個係我嘅愛子,你哋要聽從佢!」

8 佢哋立刻週圍望吓,唔見一人,只見耶穌同佢哋。

9 佢哋落山時,耶穌吩咐佢哋:「人子未從死者中復生之前,千祈唔好將所見嘅話俾任何人知。」

10 佢哋聽從耶穌嘅吩咐,彼此討論話:「從死者中復生係乜嘢意思呢?」

11 佢哋又問耶穌:「點解經學教師話以利亞必須先嚟呢?」

12 耶穌答話:「以利亞的確要先嚟準備一切;但係,聖經點解又話人子必須受苦難同被丟棄呢?

13 我話你哋知,以利亞已經嚟,佢哋任意對待佢,正如聖經指佢所講嘅。」

醫好被鬼迷嘅兒童

14 佢哋返到其他門徒嗰處時,睇見一大班人圍住佢哋。有啲經學教師正在同門徒辯論。

15 羣眾一見耶穌就非常詫異;走前迎接佢。

16 耶穌問門徒:「你哋同佢哋辯論緊乜嘢呢?」

17 人羣裏有一人話:「老師,我帶我嘅仔嚟見你;因為佢被啞鬼所迷,不能講嘢。

18 每當鬼襲擊佢,就扔佢落地,使佢口吐白泡,咬緊牙關,成身僵硬。我請求你嘅門徒將鬼趕出,但係佢哋無能為力。」

19 耶穌對佢哋話:「我重要喺你哋處幾耐呢?重要容忍你哋幾耐呢?帶佢嚟我處喇!」

20 佢哋就將佢帶嚟。隻鬼一見耶穌,立刻使個仔劇烈抽筋,蹼喺地上打滾,口吐白泡。

21 耶穌問佢父親:「佢得噉嘅病有幾耐呢?」佢答話:「自細就有喇。

22 鬼多次想殺佢,將佢扔入火裏,推落水。你若能,求你憐憫我哋,幫助我哋。」

23 耶穌話:「你使乜講,你若能!在信嘅人,凡事都可能。」

24 個仔嘅父親立刻大聲話:「我信,但我嘅信若唔夠,求你幫助我!」

25 耶穌睇見羣眾走前嚟,就嚴厲命令個鬼:「聾啞鬼,我命令你從佢身上出嚟,唔准你再入去!」

26 個鬼大叫一聲,使個仔猛烈抽筋,就出嚟。個仔好似死人一樣,眾人都話:「佢死咗咯!」

27 但係耶穌拉住佢嘅手,扶起佢,佢就企起。

28 耶穌入咗屋,門徒靜靜問佢:「點解我哋唔能將嗰隻鬼趕走呢?

29 耶穌話:「只有靠禱告致能趕走呢種鬼,此外冇其他方法。」

耶穌再預言自己嘅死

30 佢哋離開嗰處,經過加利利。耶穌唔想任何人知道佢嘅行蹤,

31 因為佢正喺處教導門徒。話:「人子將要交過人手;佢哋殺佢,過三日佢就復生。」

32 但係佢哋唔明白呢啲話嘅意思,又唔敢問佢。

邊個最大

33 佢哋嚟到迦百農,入屋後耶穌問佢嘅門徒:「你哋喺路上爭論乜嘢呢?」

34 佢哋唔出聲,因為佢哋爭論邊個最大。

35 耶穌坐低,叫十二門徒到佢面前,對佢哋話:「邊個要居首位,邊個就要喺大眾後面,做大眾嘅僕人。」

36 於是佢搵一個小孩嚟,叫佢企喺佢哋中間,又抱起佢,對佢哋話:

37 「為我而接待噉樣嘅小孩嘅,就係接待我。接待我嘅,唔單止接待我,乃係接待打發我嚟嘅嗰位。」

反對或贊同

38 約翰對耶穌話:「老師,我哋見有人奉你嘅名趕鬼,就禁止佢,因為佢唔係跟從我哋嘅。」

39 耶穌話:「唔好禁止佢;因為冇人會奉我嘅名行神蹟,又轉過嚟講壞話攻擊我。

40 唔反對我哋嘅,就係贊同我哋嘅。

41 我實在話你哋知,無論邊個,只因你哋係屬基督而俾一杯清水你哋飲嘅,必會得到賞賜。」

罪嘅誘惑

42 耶穌話:「無論邊個使信徒中任何一個微小嘅離棄我,不如用大磨石掛喺佢頸上,將佢沉落海底。

43 若你嘅一隻手使你犯罪,斬咗佢!少一隻手而得永生,比雙手齊全而落地獄、喺永唔熄滅嘅烈火裏好得多。

44 (嗰處,蟲唔死,烈火永唔熄滅。)

45 若你嘅一隻腳使你犯罪,斬咗佢!少一隻腳而得永生,比雙腳齊全但被扔落地獄裏好得多。

46 (嗰處,蟲唔死,烈火永唔熄滅。)

47 若你嘅一隻眼使你犯罪,挖佢出嚟!少一隻眼而入上帝國,比雙眼齊但被扔落地獄裏好得多。

48 (嗰處,蟲唔死,烈火永唔熄滅。)

49 每個人都要被火鍛鍊,好似用鹽醃一樣。

50 鹽本來係好嘅,若失去鹹味,點能使佢再鹹呢?你哋要有鹽嘅作用,彼此和睦相處。」